Jowai, Ïaïong 25
Ka lympung ïalehkai District Cricket League ba pynïaid da ka West Jaiñtia Hills District Cricket Association (WJHDCA) ha ka sngi Thohdieng ha madan Khliehtyrshi ka la long kaba noh shiliang ha kaba ka Mupliang SC ka la jop da 8 wiket ïa ka West Jaiñtia Police CC.
Ha kane ka jingïakhun, ka Mupliang SC kaba la jop kynting pisa, ka la ailad ïa ka West Jaintia Police CC ban tied nyngkong ha kaba ka la ïoh tang 104 run hadien ba ka la shah pynhap 10 wiket ha ki 25.2 over. Haba wan shimti ïa ka pali kaba ar, ka Mupliang SC ka la lah ban kynjoh sha ka thong da kaba ka la tied 109 run ha ki 17.3 over bad shah pynhap tang 2 wiket.
U Kapten ka Mupliang Defender Dhar uba la shim 4 wiket ha ki 6.2 over, u la ïohpdiang ïa ka nam Man of the Match.
Ka jingïalehkai mynta ka sngi Saitjaiñ kan long hapdeng ka Young Lad’s CC pyrshah ïa ka Ever-green Mukhla Mission ha ka por 9 baje mynstep.
