Shillong, Ïaïong 25
Ka Ri Bhoi Livestock and Supplier Association (RBL&SA) mynta ka sngi ka 25 tarik u Ïaïong, 2025, ki la leit ban ïakynduh ïa u Myntri ka Sorkar Jylla uba dei khmih ïa ka Tnat Ri Jingri, Bah Alexander Laloo Hek haba ïadei bad ka jingpan NOC ban buh noh ïa ka khyrdop talasi ne ka ‘Check Point’ hapoh u pud-u sam jong ka Ri-Bhoi District.
Haba kren sha ki lad pathai khubor hadien ka jingwan ïakynduh ïa u Myntri, u Bah Pynshngaiñ Shylla, President ka Ri Bhoi Livestock And Supplier Association, u la ong ba ha ka jingïalang jong kynhun kaba la pynlong ha ka 5 tarik u bnai Ïaïong, 2025, ki la shim da ka rai ban phah da ka shithi sha ki bor ba dei khmih na ka bynta ban ailad ïa ka synjuk ba kan buh noh ïa ka Check Point na ka bynta ban khmih ïa ki mrad ha shwa ba kin rung shapoh ka Jylla Meghalaya kiba wanrah na ka Jylla Assam.
U la ong ba ka jingmut jong kane ka Check Point ka long ban pynthikna na ka bynta ka koit-ka khiah bad ka jingshngaiñ jong ki paidbah nongbam ïa ka doh bad ha kajuh ka por ruh ban pynmih ïa ka khajna jong ka Sorkar.
U Bah Pynshngaiñ u la ong ba ki jaka kaba ka synjuk ka la buh kum ki jingtyrwa ban buh ïa kitei ki khyrdop talasi ha Ri-Bhoi ki long ha Umsiang Maïong, Mawlasnai, Jirang bad hi ki thaiñ ka Byrnihat.
“Ngi la pan ruh ïa ka jaka ban khmih ïa ka koit-ka khiah ki mrad bad na ka liang u Myntri u la ong ban pynbiang shwa ïa ka ïew bad ïa kita baroh un sa ïarap ban leh ïa kata”, ong u Bah Pynshngaiñ.
Na ka liang u Myntri u la pynpaw ka jinglong kloi ban ai ïa ka kti kamon-ka kti kadiang ïa ka synjuk ban leh ïa ka donkam hynrei u la kyntu ïa ka synjuk ba ïa mynta kin hap ban rejistar shwa ïa ka ïew bad hadien kata un sa leh ïa kaba donkam ban ïarap ïa ka synjuk.
