Shillong, Ïaïong 25
Ka Sorkar Jylla ka la dep ban ïakren bad ïasyllok bad ki bor pahara khappud, kynthup ki BSF, ki shnat ba dei khmih ïa ka jingïada jong ka Sorkar Jylla bad Sorkar Pdeng na ka bynta ban pynthikna ka jingshngaiñ ha khappud India-Bangladesh.
Kane ka jingïakynduh jong ka Sorkar bad ki bor pahara ka long hadien jong ka jingjia shah pyntriem ki nongshang kai pyrthei ha Pahalgam, Jammu & Kashmir, ha kaba 28 ngut ki rangbah briew ki la ïap ha ki kuli jong ki lehnoh.
Haba kren bad ki lad pathai khubor, u Symbud Myntri Rangbah ka Jylla ba khmih ïa ka tnat Pohïing (Police), Bah Prestone Tynsong u la ïathuh ba ka Sorkar Jylla ka la dep ban ïakren sani bha na ka bynta ka jingshngaiñ ha khappud India bad Bangladesh, bad baroh ki bor ba dei khmih ïa ka jingïada ki don lang kajuh ka jingmut ban pynthikna ka jingshngaiñ ha khappud, khamtam ba ha Ri Bangladesh ka don hapdeng ka jingkulmar ha ka saiñpyrthei.
“Ngi la don ka jingïalang bad ki heh BSF kumjuh bad ki agency ka Sorkar Pdeng bad jong ka Jylla. Ngi don kajuh ka jingmut ban pynthikna ka jingïada bad ka jingshngaiñ ha khappud India-Bangladesh ïoh don ka jingpyrshang ban wan rung be-aiñ,” u la ong.
Haba kylli halor ki jaka bym pat dep ker sainar shiah ha khappud, u Bah Prestone u la ong ba ïa kane ruh ka Sorkar ka la shim khia da kaba pynkhlaiñ ïa ki bor pahara ba kynthup ïa ki BSF bad ki pulit ka Jylla, ryngkat ka jingïatreilang bad ki bor pynïaid shnong kumjuh ki VDP ban pynthikna ba kan ym don ka jingwan rung be-aiñ jong ki briew na Bangladesh.
“Phi la ïohi ha ki kotkhubor, man la ka por la ïoh bat bun ngut kiba wan rung be-aiñ bad la set patok katkum ka Foreigners Act,” la ong u Symbud Myntri Rangbah.
