Shillong, Ïaïong 25
Ka phlim Khasi kaba la ai kyrteng ‘Ha Lyngkha Bneng’ (The Elysian Field) kaba la ïoh rynsan ha ka tamasa pyni phlim baheh jong ka pyrthei – ka ’47th Moscow International Film Festival 2025′ ka la ïoh rah ruh ïa ka khusnam ‘NETPAC Jury Award’ kum ka ‘Best Asian Film’.
Ka jingsarong kaba kham khraw shuh-shuh ïa kane ka phlim ka long ruh ba ka la ïoh ïa ka khusnam ‘Best Film’ bad ‘Best Director’ ha ka ‘Main Competition’ jong kane ka tamasa pyni phlim kaba heh jong ka pyrthei ka ‘Moscow Film International Film Festival 2025’.
Ka jingïoh kane ka phlim ïa kine ki khusnam kiba heh ka dei halor ka jingbit ka khana bad ka jingnang ban ring dur namar kane ka phlim ka la lah ban pyni ïa ki dur jong ka ïa ka jingim bad ka jingïap lyngba ka ktien poitri kaba pynitynnad shuh-shuh ïa ka phlim.
Ïa kane ka phlim la pynbit pynbiang da u Bah Pradip Kurbah, uba dei uwei na ka nongshna phlim ba paw jong ka Jylla bad la pynmih ïa kane ka phlim da ka ‘Kurbah Films’ ryngkat ka jingkyrshan na ka ‘Hello Meghalaya’, Ka ‘Pomus New Horizon’, ka ‘Knup Creative’ bad ka ‘Cat N Mouse Entertainment’ bad ki tyngshop ki puron kiba ïadon bynta ha kane ka phlim ki long u Bah Richard Kharpuri, ka Helena Duiia, ka Baïa Marbaniang, u Albert Mawrie, u Merlvin Mukhim bad kiwei-kiwei.
Lah ban kdew ba kane ka ’47th Moscow International Film Festival’ ka la long ha Russia naduh ka 17 tarik haduh ka 24 tarik mynta u bnai.
