Guwahati, ïaïong:
Ki pulit ka Assam ki la ïohlad ban pyllait im ïa iwei i khyllung kynthei ba dang shi snem iba la shah die lajan 11 bnai ba la leit ha u kpa nah.
La kem ïa ar ngut ki briew kiba donkti ha kane ka kam runar, la pynthikna u Deputy Commissioner of Police (East) u Mrinal Deka ha ka sngi Ba-ar.
Ka kmie jong ine i heprit ka la ujor sha ki pulit jong ka Basistha ha ka Lah Sngi U Blei, da kaba batai bniah ïa ka jingjia kaba pynkulmar jingmut. Ka la kynnoh ba u kpa nah jong ine i khyllung, u la rah ïa i ha ka 30 tarik, Jymmang, 2024, da kaba leh mynleh ban wad jingsumar katba u kurim jong ka, u dang don shabar.
Hadien katto-katne sngi, ka la tip ba la die noh ïa ka khun jong ka kaba dang shibnai ha kato ka por ha ka dor T. 5,000.
Da kaba pynstet ïa ka jingpyntreikam, ki pulit ki la buh da ka jingmudui mukotduma bad ki la sdang ïa ka jingtohkit. Ka kynhun ba kyrpang kaba la wad ka la lap dien ïa ine i khyllung sha ka shnong Sontali kaba don ha Kamrup distrik, ha kaba la shem ba kam don jingma ei ei ïa i.
“La pyllait im ïa ine i khyllung ha ka por ba la don ka jingpyntreikam ban leit wad ïa i bad baroh ar ngut, u kpa nah, uba la ïohnong ha kaba dei ïa ine i khyllung, bad u nongthied ki la shahkem na kane ka shnong,” la ong u DCP Deka ha ka jingïalang bad ki nongthoh khubor.
Ka kmie, kaba dei ka nongshong shnong jong ka thaiñ na ka Games Village ha Guwahati, ka la pynpaw ïa ka jingsngewsuk, namar ba ka la ïoh ban ïakynduh biang bad ka khun jong ka.
Ki pulit mynta ki dang tohkit ïa ki jingktah kiba kham jylliew jong katei ka mukotduma, kynthup la kitei kiba shah kynnoh, ki dei shi bynta jong ka kynhun khaïi briew kaba kham heh.
Ki bor synshar ki la pynpaw biang ïa ka jingkular jong ki ban ïada ïa ki khynnah rit bad ban pynthikna ba ïa kum kine ki jingjia yn leh katkum ki kyndon kiba pyrkhing tam jong ka aiñ. Ka jingtohkit katkum ki kyndon aiñ kiba bniah ki la ïai bteng pyrshah ïa kine ki briew kiba la shahkem.
