Shillong, Ïaïong 25
U Symbud Myntri Rangbah ka Jylla ba khmih ïa ka tnat Pohïing (Police), Bah Prestone Tynsong u la ong ba ka jingkynthoh Pyrshah Ri (Anti National) jong u Simon Shylla ha sla Facebook, kan ktah ym tang ïa ka Jylla Meghalaya, hynrei ïa baroh kawei ka Ri namar ka dei ka jingkynthoh pyrshah ïa ka Ri India.
Haba kren bad ki lad pathai khubor ha ka Sngi Thohdieng, u la ong ba ka jingshim kam noh wut-wut da ki pulit ka long ban ym pynshlur ïa kino-kino ki kam be-aiñ, kiba lah ban ktah ïa ka jingshngaiñ ki nongshong shnong ka Jylla bad kumjuh jong ka Ri India.
“Ka jingkynthoh ba la pynmih da uto u khynnah ka dei beit pyrshah ïa ka Ri India (Anti National), kan ktah ym tang ïa ka Meghalaya hynrei ïa baroh kawei ka Ri bad kan pynshlur ïa bun ki kam be-aiñ kiba wanrah pat ka jingma ha ka jingshngaiñ ïa ki nongshong shnong ka Jylla bad ki nongshong shnong ka India baroh kawei. Kumta, ngi la shim khia bha ïa kane ka kam bad na kata ka daw la shim kam wut-wut da ki pulit,” u la ong.
Na ka liang u Symbud Myntri Rangbah u la kyntu ïa baroh ki nongshong shnong ba kin ïeng tylli lang bad ba ym dei ban ailad ba kan don biang ka jingkynthoh pyrshah ïa ka Ri.
“Ka jingkyrpad jong nga sha baroh ki nongshong shnong ka Jylla bad ki nongshong shnong ka Ri India baroh kawei, ïa ngin ïa ïeng tylli lang kawei bad ngim dei ban ailad ïa kum kine ki jingkren pyrshah ri ba kan jia biang ha ka Ri,” la ong u Bah Prestone.
Ha ka Sngi Palei ki Pulit Special Cell ka East Khasi Hills, ki la kem ïa u Simon Shylla na ka ïing sah jong u kaba don ha Umlyngka, Upper Shillong namar ka jingkynthoh pyrshah ïa ka Ri India ha sla Facebook ba la ai kyrteng “Man Shylla”, ha kaba ïadei bad ka khubor kam pyntriem ha Pahalgam, Jammu & Kashmir bad kyrshan ïa ka kam pyntriem ki lehnoh.
Ïa une u briew la pynngat mukotduma ha thanat Lumdiengjri halor ka jingkynthoh kaba u la pynpaw ba ki lehnoh ki dei ban leh kum kane ka juh ka kam pyntriem ïa kawei ka jaidbynriew ha ka thaiñ Shatei Lam Mihngi kaba buh jingma ïa ka jingïalong kawei bad ka jingïatylli jong ka Ri.
Ki pulit ha ka Sngi Thohdieng ki la ïalam noh ïa u Simon Shylla sha Kashari District & Session Court, East Khasi Hills, bad ka ïingkashari ka la pynmih hukum ban set haduh 14 sngi ha Judicial Custody.
