New Delhi, Ïaïong 25 (UNI)
U Myntri ka tnad Pohïing ka Sorkar Pdeng, u Amit Shah, ha ka Sngi Thohdieng, u la bthah ïa baroh ki Myntri Rangbah ban pynithuh kloi ïa ki nong Pakistan kiba shong ba sah ha ki Jylla jong ki, khnang ba yn lah ban phah biang noh ïa ki.
Katkum ki tyllong khubor, u Myntri kam pohïing, u Shah u la ïakren bad ki Myntri Rangbah jong baroh ki Jylla, da kaba kyrpad ïa ki ban shim ki sienjam ba mardor ha ka ban pynithuh kumjuh ban sdang noh ïa ka kam ban pynkynriah ne phah mih noh ïa ki nongshong shnong ka Pakistan.
U la bthah ruh ïa ki bor synshar Jylla ban pyntip ïa ki jingtip ba bniah sha ka Sorkar Pdeng, khnang ban pyndam noh ïa ki ‘Visa’ kumjuh ban pynsted ïa ka rukom haba ïadei bad ka jingpynkynriah.
Kum ban shu kdew, ha ka 22 tarik u Ïaïong, ka sngi jong ka jingshah thombor ha Pahalgam, kaba la ïalam sha ka jingkhlad noh jong 26 ngut ki nongjngohkai pyrthei, u Myntri ka tnad kam pohïing ka Sorkar Pdeng mar-mar u la leit sha Srinagar ban shimkhia hi dalade halor ka jinglong-jingman.
Ha ka jingïalang jong ka Cabinet Committee on Security (CCS) kaba la pynïaid da u Myntri Rangbahduh ka ri, Narendra Modi, ha ka 23 tarik Ïaïong, la shim ïa ki katto-katne ki rai kiba tyngeh pyrshah ïa ka Pakistan, kynthup ka jingpyndam noh ïa ki ‘Visa’ jong ki trai-ri Pakistan bad ka jingkhang ba mardor ïa ka Integrated Check Post ha Attari.
