Nongpoh, Ïaïong 25
U Senior Superintendent of Police ka Ri-Bhoi District, Vivekanand Singh Rathore ha ka kyrwoh khubor kaba la pyllait paidbah mynta ka sngi, u la pyntip paidbah ba baroh ki nong Pakistan lait noh kito kiba wan lyngba ka ‘Long Term Visa’ bad ka ‘Diplomatic’ lane ‘Official Visa’ ba ki dei ban mih noh mardor na u pud u sam ka ri India ha lane shwa ka 27 tarik u Ïaïong, 2025.
U la pyntip ruh ba ki nong Pakistan kiba wan lyngba ka ‘Medical Visa’ ba ki dei ban mih noh na ka ri India shuwa ka 29 tarik u Ïaïong, 2025 bad kito kiba wan lyngba ka ‘SAARC Visa’ ba ki dei ban mih noh shuwa ka 26 tarik jong u bnai Ïaïong, 2025 bad kino-kino ki bym bud ïa kine ki hukum kiba la pynmih kin ngat ha ka jingpynshitom kaba tyngeh katkum ki kyndon aiñ. Shuh shuh, na ka liang u Vivekanand Singh Rathore u pyntip ba lada don kino-kino ki ‘riew paidbah kiba don jingtip halor ka jingdon jong ki briew na ka ri Pakistan ba kin pyntip sha ki bor pulit da kaba ‘phone’ ha u nombor 112, uba dei u nombar jong ka Police Control Room.
Kum ban shu kdew, kane ka jingpynmih hukum ka dei shi bynta katkum ka hukum ba la pynmih da ka Ministry of Home Affairs (MHA) kaba la bthah ba baroh ki nong Pakistan ki dei ban mih noh na ka ri, hadien ka jingjia shah siat ïap jong 26 ngut ki nongleit jngohkai pyrthei ha ki lehnoh kaba la jia ha Pahalgam jong ka Jylla Jammu & Kashmir ha ka 22 tarik u bnai Ïaïong, 2025.
