Shillong, Ïaïong 25
Ha ka janmiet Sngi Palei, uwei u Asst. Professor ka Department Hindi ha ka North Eastern Hill University (NEHU), Dr. Alok Singh u la kynnoh ba u la shah shoh shah dat ha ka kynhun ki runar kiba la leit rung jubor hapoh ka kamra treikam jong u.
Katkum ka jingïathuh u Dr. Alok Singh, kane ka jingjia ka la jia ha ka por 4:45 baje janmiet katba u dang don ha kamra. U la ïathuh ba hynriew ngut ki samla pule ki la leit rung ha kamra bad ki la khang ïa ka jingkhang bad ktah kti beit-beit ïa u katba kiwei pat ki dang ïeng hakhmat jingkhang.
U la ïathuh ba ar ngut na kine ki samla ki la bat ïa ka kti jong u, katba saw ngut ki la shoh ïa u bad hadien katto-katne por, ki la khot ïa ki samla ba ïeng ha jingkhang ba kin shoh lang.
U la ïathuh shuh-shuh ba kine ki samla ki khlem ailad satia ïano-ïano ruh ban wan shajan ka kamra ba u shong katba u dang shah thombor.
U Dr. Alok u la pyntip ba ki nongthombor ki khlem ai kano-kano ka daw halor kane ka jing-thombor, hynrei ki la shu kynnoh ïa u ba u leh politik bad pyrshang ban pynïadei bad ka Rashtriya Swayamsevak Sangh (RSS) bad Akhil Bharatiya Vidyarthi Parishad (ABVP).
“Ki ong me leh politik hangne bad wanrah ïa ki jingthmu bapher-bapher hangne. Ki la kynjat ïa nga, kura ïa nga wat haba nga la kyllon, ki la khyllie bad bteng ban shoh biang,” u la ong haba batai ïa kaba jia.
U la ïathuh ruh ba ha shwa ban sdang kane ka jingthombor ba shiteng kynta eiei, kine ki samla ki la knieh shwa ïa ka phone jong u bad peit kiei kiba don hapoh ka phone, kynthup ki dur bad durkhih bad jynrat ïa baroh ki waïar jong ka computer bad knieh ruh ïa ka smart watch, da kaba suba ba ka dei ka camera ba buhrieh.
U la ïathuh ba uwei na ki nongthombor u la shim ïa ka khanshi na ka miej bad pynap na ryndang jong u ryngkat ka byrngem ban pynïap.
“Ngam ju mutdur ba kum kane ka jingjia kan wan jia ïa nga. Kum u nonghikai nga sngew ba nga la shah pynjah burom. Ki ïai pyrshang ban pynïadei ïa nga bad ka RSS bad ABVP bad ïai shoh ïa nga. Ngam ju mutdur ba ngan shah shoh ha la ki jong ki samla pule,” u la ong.
Shuh shuh, u Dr. Alok u la kynnoh ba kine ki samla ki la byrngem ïa u ba u dei ban mih noh na ka skulbah bad ban ym wan phai shuh.
Haba kylli, une u nonghikai u la ïathuh ba u lah ban pynithuh ïa ki samla kiba donkti ha ka ban shoh ïa u kiba dei ki dkhot ka NEHUSU bad katto-katne ngut ki samla pule jong u hi.
Ban pynrem jur ïa kane ka jingjia, ki nonghikai jong ka NEHU ha ka janmiet Sngi Thohdieng ki la pynlong da ka jingïakhih ba jai-jai hakhmat ka kamra treikam u Vice Chancellor ban pan ka jingkular na ki bor pynïaid, bad dawa ruh ban shim ïa ki sienjam ki ban pynthikna ïa ka jingshngaiñ bad jingïada ïa ki nonghikai.
Na ka liang utei u Dr. Alok Singh ha ka Sngi Thohdieng u la ujor noh da ka ejahar ha thanat Mawlai, bad ha ka ejahar u la jer kyrteng ïa u President ka NEHUSU, Sandy Sohtun bad san ngut kiwei pat, kiba u la kynnoh ba ki donkti ban thombor bad shoh dusmon ïa u ha NEHU. Kat kum ka ejahar ba la mudui u la pynpaw ba ha ka janmiet Sngi Palei, ha ka por 4:45 baje, u President ka NEHUSU bad san ngut kiwei pat, ki la leit rung bad khang jubor ïa u hapoh ka kamra jong ka Hindi Department.
Ha ka ejahar une u nonghikai u la kyntu ïa ki pulit ba kin shim kam mardor da ki lynti ka aiñ halor kane ka jingjia bad ban pynthikna ka jingshngaiñ jong u bad ban pynneh ïa ka burom jong ka skulbah.
