Shillong, Ïaïong 25
U nongpyntrei (contractor) ïa ka jingkieng ba thymmai ha Umïam kaba pynïasoh ïa ka East Khasi Hills District bad Ribhoi District u la ïoh ban sdang ïa ka kam mynta la ar bnai hadien ba ka Sorkar Jylla lyngba ka tnad PWD (Roads) ka la mang pisa haduh T. 24.5 klur (Arphewsaw klur Sanphew lak tyngka) ban shna ïa ka jingkieng thymmai ha Umïam bad ruh ïa ka surok ha ka jingjrong kaba 2.26 kilometre.
Ka jingshna thymmai ka Sorkar Jylla ïa kane ka jingkieng ka dei namar ka jingkieng barim jong ka tnat MeECL kaba dang shu dep maramot mynshem snem kam long shngaiñ shuh ban ïaid ki kali heh hynrei mynta la shah ban ïaid tang ki kali rit.
La ïohi ruh ba ïa kane ka jingkieng kaba ker ïa ka pung Umïam naduh ba la dep maramot la pynïeng da u nar hapdeng surok ban ym shah shuh ban ïaid ki trok kiba kit mar khia.
Ïa kane ka jingkieng thymmai la shna harum jong ka jingkieng barim kaba la ïaid mynta ar bnai kaba la sdang ha u bnai Lber 2025 ha kaba la ïohi ba la sdang ban tih nongrim ban pynïeng païa ha baroh arliang ki kynroh. Ka sorkar ka la dep pruid dak ba ynda la dep shna ïa ka jingkieng bathymmai kiba wan na Shillong kin ïaid na kamon kaba don ka lad shwa ban poi sha jingkieng barim ban hiar beit sharum, katba kiba wan na Ribhoi kin ïaid na ka surok kaba leit sha ki jaka ba don ki karkhana ha shnong Umïam.
Shuh shuh ka Sorkar Jylla ka la buh thong ban phah pyndep ha u contractor hapoh ar snem naduh ba la ïoh ïa ka ‘work order’.
Ka tnad PWD (Roads) kan shna ïa kane ka surok ha ka jingïar kaba 5.5 meter ha ka jingjrong kaba 2.26 kilometre khnang ba ki trok kit mar kin ïoh ban ïaid na kane ka surok namar ka kham jan lada wan na Guwahati sha Shillong.
Ka jingbym shah shuh ïa ki trok kit mar ban ïaid na jingkieng Umïam kaba mynta ka la buh jingeh ïa ki nongkhaïi namar ki hap ban ïaid naduh Shillong By-pass kaba la jngai bun shah ban poi shaduh Shillong.
Wat la ïa kane ka surok Shillong-Guwahati la peit da ka National Highway kaba la mang pisa barabor da ka Sorkar India hynrei ïa kane ka jingkieng bathymmai ka Sorkar Jylla ka la pynlut na ka pla tyngka jong ka jylla haduh 24.5 klur tyngka khnang ban pynsted ban tei ïa kane ka jingkieng ba kin ïoh ban ïaid noh ki trok kit mar khnang ban nym ktah ïa ka jingkiewdor ki mar ki mata hadien habud.
