Nongstoiñ, Ïaïong 25
Ka Nongpyndeng SS &CC ka la jam sha ka final ha ka First Division jong ka NDSA Premier League Football Tournament 2024-25, hadien ba ka la pynliem noh ïa ka Mawkhlam SC da 3-2 kol ha ka jingïalehkai semi final kaba la long ha ka sngi Thohdieng ha madan New Nongstoiñ.
Ha lyndet kane ka jingjop jong ka Nongpyndeng ka la wan lyngba ka hat-trick na u Pynbiang Kharsyntiew uba la ïoh ban thep haduh lai kol ha ka minit kaba 19, 40 & 80, katba ka Mawkhlam ka la ïoh ban thep ha ka minit kaba 10 na u Johnbosco Kharbani bad ha ka minit kaba 84 na u Shaibarlin Rimen.
Na ka liang ka Football Committee jong ka NDSA, ka la pyntip ba ka jingïalehkai semi final kaba ar kan long mynta ka sngi Saitjaiñ ha ka por 2 baje nohphai sngi ha madan New Nongstoiñ ha kaba ka Ladnongsba SC pyrshah ïa ka Nongkhlaw SC.
