Shillong, Ïaïong 25
Ka jingkyntiap klob jong ki District lane ka Inter District Transfer jong u snem 2025 na ka bynta ki nongïalehkai phutbol kiba hap hapoh ka Meghalaya Football Association (MFA) kan sdang naduh ka 28 tarik mynta u bnai.
Kat kum ka kyrwoh ba la pyllait da u Bah Sunesh Syiem, General Secretary jong ka MFA, la ong ba ïa ki Transfer Form kiba lai syrtap lah ban ïoh na ka shlem treikam jong ka MFA kaba don ha J.N Stadium, Polo Shillong da kaba siew T.100/- shi set naduh ka 28 tarik haduh ka 10 tarik u Jymmang naduh ka por 3 baje nohphai sngi haduh 5 baje janmiet man la ka sngi, lait noh ka sngi U Blei.
Ïa ki form rong saw blad (pink) dei ban pynpoi sha ophis jong ka MFA, nangta ka form rong lieh yn bat da ka District Sports Association, katba ïa ka form rong saw yn bat da ka klob. Yn ym pdiang ïa ki form khlem ki dur kiba ïadei bad u nongïalehkai uba kynriah klob.
Ban pyndep ïa ka transfer, ki nongïalehkai ki dei ban soi hi dalade ïa ka register kaba don ha shlem treikam jong ka MFA da kaba siew T. 1,000/-. Ïa kane lah ban pyndep hapdeng ka 12 tarik haduh ka 17 tarik Jymmang naduh ka por 3 baje nohphai sngi haduh 5 baje janmiet.
Hadien ba la dep ïa ka transfer, ka MFA kan sa pynbna ïa ki thup kyrteng kiba khatduh jong ki nongïalehkai kiba la kynriah klob sha baroh ki synjuk District ba ïasoh bad ka MFA.
