Shillong, Ïaïong 25
Ka Sorkar Jylla ha ka Sngi Thohdieng ka la phah pynkhlaiñ ïa ki bor pahara ha skulbah North Eastern Hill University (NEHU), hadien ba shah shoh uwei Assistant Professor, Alok Singh ha ka Sngi Palei.
U Symbud Myntri Rangbah ba khmih ïa ka tnat Pohïing ka Jylla, Bah Prestone Tynsong haba kren sha ki lad pathai khubor ha ka Sngi Thohdieng, u la ong ba ka aiñ kan leh ïa kaba donkam halor ka jingjia ha NEHU, ha kaba u la ïathuh ba u la bthah ïa ka tnat pulit ban pynkhlaiñ ïa ki bor pahara ha katei ka skulbah na ka bynta ka jingshngaiñ jong baroh, la ka long ïa ki samla pule ne ki nonghikai.
“Ka aiñ kan leh ïa kaba donkam, nga la bthah ïa u SP bad ki bor ka aiñ ban pynthikna ba kan don ka jingïada bad jingshngaiñ ha NEHU,” u la ong, haba kyntu ruh ïa ki nonghikai ba kim dei ban khuslai namar ba ka Sorkar ka la shim ïa ka sienjam ban wanrah ïa ka jingshngaiñ. U la ong ba ka Sorkar hadien ba ka la tip ïa ki jingjia ha NEHU, ka la shim ïa ki sienjam ban wanrah ka jingïada bad jingshngaiñ ïa baroh kiba ai ka jingshakri ha kane ka Jylla, la ka dei ïa ki trai nongshong shnong ne ki bym dei trai shnong.
“Ngi kyrpad ïa baroh lang, sngewbha ban ym pyrkhat bakla lane ïalam bakla ïa ki paidbah, namar ngi shim khia bad ngi don hangne ban pynthikna ba uwei-pa-uwei u briew la u dei uba nangne lane nabar, ngi pynthikna ba kin ïoh ïa ka jingïada,” la ong u Bah Prestone.
Haba kylli halor ka jingdawa ban wanrah ïa ki bor pahara jong ka Sorkar Pdeng, u Bah Prestone u la ong ba ïa kane ka jingdawa ieh ha ka jingstad jong ka Sorkar Jylla, namar ki pulit ki la leh ïa kaba donkam ban pynthikna ba kum kine ki jingjia kim dei ban dang jia biang.
Ki nonghikai ka skulbah North Eastern Hill University (NEHU), ha ka Sngi Thohdieng ki la pynlong da ka jingïakhih pyrshah ban pynrem halor ka jingshah shoh shah dat u Asst. Professor, Alok Singh ha ka janmiet Sngi Palei haduh ba un da mynsaw ha ki bynta jong ka khlieh bad ka kti.
