Shillong, Ïaïong 25
Ka Directorate of Enforcement (ED), Shillong Sub-Zonal Office ka la pynlong ïa ki jingkhynra ha ka 24 tarik mynta u bnai ha Jadigittim, Nongalbibra kiba hap ha South Garo Hills, Meghalaya bad ha Jadugopha (Bobgaigaon), Marghrita (Tinsukia) bad Guwahati ha Assam hapoh ki kyndon jong ka aiñ Prevention of Money Laundering Act, 2002 ha kaba ïadei bad ka jingtih dewïong be-aiñ bad ka jingpynïaid ïa ki karkhana thang dewïong lane ‘Coke Plant’ be-aiñ kiba treikam ha ka Jylla Meghalaya.
“Ha kane ka jingkhynra, la lap ïa ki kor ki bor ‘digital’ bad ki kot ki sla bad na ki jingïathuh jong ki briew kiba la shah kylli jingkylli, la shem ba wat lada la khang ïa ka jingtih dewïong be-aiñ mynta la 10 snem tam, hynrei ka jingtih dewïong ka dang ïaid khlem da don ki lad jingïada na ka bynta ki nongbylla kiba hap leit ngam sha ki thliew dewïong,” ong ka kyrwoh na ka ED.
Kum ban shu kdew hangne, ka ED ka la sdang ïa ka jingtohkit halor ka nongrim jong ka FIR kaba la pynrung ha Shallang, Meghalaya hapoh ki aiñ bapher-bapher kum ka Indian Penal Code, 1860, MMDR Act, 2015, Environment (Protection) Act, 1986, Explosive Substances Act, 1883 bad ka Benami Transaction (Prohibition) Act, 1988.
Ha kane ka jingkhynra la lap ba ki Manager, ki Sordar bad ki nongbylla ki trei ïa ka kam tih dewïong be-aiñ – ka jaka jong ka Jadigittim, South Garo Hills da kaba pyndonkam da ki tiar tih kiba naduh hyndai. Ka ED ka la ong ruh ba ka la lap kumba 20 tylli ki par dewïong kiba ka jingtih dewïong be-aiñ ka dang ïaid.
Kine ki par ki don ha ka thaiñ Era Aning bad Goreng.
Ha kajuh ka por, 9 ngut na ki nongbylla kiba don ha kitei ki jaka tih dewïong la aiti noh sha ki pulit jong ka thaiñ ban tohkit.
Ha ka jingtohkit jong ka ED, la lap shuh-shuh ba don da ka ‘Syndicate’ ne ka kynhun kaba don da ki briew na Meghalaya bad Assam bad kane ka kynhun ka pyntikna ba ki trok kiba kit dewïong be-aiñ kin ïoh ïaid sahuh na ki khappud jong ka Jylla Meghalaya bad ban rung sha Assam khlem kano-kano ka jingwit ne jingkhang ha kaba la pynkhreh ïa ki kot ban pyni ïa kane kum u dewïong ba la tih katkum ka aiñ.
Shuh shuh la ong ba katei ka kynhun ka shim kumba T. 1.27 lak haduh 1.5 lak na kawei ka trok na ki trai dewïong ha ka kyrteng jong ka ‘Commission’.
Nalorkata, la ong ruh ba ïa u dewïong ba la tih be-aiñ, la buh ha ki ‘Depot’ kiba don ha Jogighopa, Assam bad hadien kata la pynkit sha ki jaka bapher-bapher kum ki karkhana shna dewbilat, karkhana saiñ nar, karkhana thang dewïong be-aiñ bad kiwei.
La pynpaw shuh-shuh ba ki briew kiba pynïaid ïa ka ‘Depot’ ha Jogighopa, Assam ki donkti ban pynmih ïa ki ‘Bill’ lane ‘Invoice’ kiba thok ha kaba la pyni ba ïa u dewïong ba la tih be-aiñ la thied na ki katto-katne kiba long katkum ka aiñ na Assam.
Kumjuh, ïa ka pisa kaba la mih na kitei ki kam be-aiñ la lum da ka kynhun bad la buh ïa ka pisa ha ki jaka jong ki nongpynïaid pisa. Na ka liang ka ED ka la khynra ïa ki jaka jong ki nongbuh pisa bad la kurup ïa ki kot ba la buh jingthoh halor ka jingrung bad jingmih ka pisa.
Nalorkata, la ong ba ki trai par dewïong bad ki briew jong kata ka kynhun (syndicate) ki ju ïatreilang bad ki nongpynïaid be-aiñ ïa u dewïong ha Marghrita Tinsukia ban pyni kumba la tih na ki par dewïong kiba long katkum ka aiñ.
Na ki kot ki sla ba la ïoh kurup bad na ka jingïathuh jong ki Manager, ki trai-par dewïong bad ki nongbylla, la pynpaw ba la kit kumba 5-7 tylli ki trok man ka sngi na kawei-pa-kawei ka par dewïong. Kawei ka trok ka kit haduh 12-16 ton u dewïong ba la tih be-aiñ.
Kumta, ka jingkheiñ kaba pdeng ïa u dewïong ba la tih be-aiñ ha ka shisngi na ka thaiñ Era Aning bad Goreng jong ka South Garo Hills ka long kumba 1,200 ton ha ka shisngi.
Ka kyrwoh ka ong ruh ba ki trai par ki ju ïoh kumba T. 5,000-10,000 na kawei ka trok bad kane ka dei tang ka jingïohnong hadien ba ka la dep siew ki jinglut-jingsep baroh.
Ha ka jingkhynra, la lap ïa ka pisa kaba T. 1.58 klur, ki tiar ‘digital’ kum ki ‘laptop’, ki ‘mobile phone’ bad ar tylli ki kali remdor ba la suba ba la thied na ka jingdie be-aiñ ïa u dewïong.
Na ka liang ka Enforcement Directorate ka la ong ba ka jingtohkit halor kane ka kam ka dang ïaid shakhmat.
