Shillong, Ïaïong 27
U MLA ka North Shillong Constituency, Bah Adelbert Nongrum ha ryngkat bad ki nongïalam shnong jong ka Jaïaw Pyllun kiba kynthup ïa ki hynriew tylli ki Dorbar Shnong bad ki nongïalam shnong jong ka Dorbar Shnong Mawkhar, Mission Compound, Umsohsun bad Wahthapbru ha ka 26 tarik u Ïaïong, 2025, ki la leit ban jurip biang ïa ki jaka kiba don ha ka thaiñ Motphran bad Mission Compound kiba dei ki jaka kiba jur bha na ka dheng kali.
Na ka liang u MLA ha ryngkat ki Rangbah Shnong jong ka Dorbar Shnong Mawkhar, Wahthapbru, Umsohsun, Mission Compound, Jaïaw Pdeng bad Jaïaw Laitdom ki la rai ban buh noh da ki kor ring dur ne ki CCTV Camera khnang ba ka tnat pulit kaba pynïaid kali kan pynshitom da kaba tyngeh ïa kito ki briew kiba long ka dawbah ban pynmih ïa ka dheng kali ha ki bynta katei ka surok ha ryngkat ka jingdaiñ kuna ruh bad ka jingpynshitom ïa ki.
Haba ai jingkren ha katei ka sngi hadien ka jingwan jurip ïa kitei ki bynta jong ka surok, na ka liang u MLA u la ong ba kane ka jingwan jurip ïa kitei ki bynta kam dei shuh ha ka sien kaba nyngkong hynrei ka dei kaba ki la leh na ka por sha ka por.
“Kane ka jingdheng kali khamtam hapoh ki thaiñ Motphran ha ka lad ban rung shapoh ka Mission Compound, ka dei kaba ngi leh bad thaw hi dalade. Ngi hap ban kynnoh ba ka daw ka jingmih jong kane ka jingdheng kali ka dei na ki nongñiah kali bad ngi hap ban ong ruh ba lada kim don kata ka jingsngewthuh para briew ban burom markylliang, ka ktah pat manla ka sngi khamtam ha ki por leit skul, leit trei bad ha ka por janmiet”, ong u Bah Adelbert.
U Bah Adelbert u la ong ruh ba na ka liang ki pulit pynïaid kali ki la trei la ka jong ka kamram ban pynïaid beit ïa ki kali hynrei kaba donkam ka long ruh ban wanrah ïa ka jingïatreilang bad ki paidbah.
U la ong ruh ba ka daw jong ka jingdheng kali ha kitei ki bynta ka dei napoh ka thaiñ Motphran ha ka lad ban rung shapoh ka Mission Compound ha kaba ki taksi kamai bad ki paidbah nongshong kali ki la long ka daw jong kane ka jingdheng kali. Kumta u la buh ka jingkyrpad ïa ki paidbah nongshong kali ba ki dei ban pynbiang lypa ïa ki pisa bai kali khnang ban lait na ka dheng kali haba ki hiar ha katei ka jaka.
U Bah Adelbert u la ong ba kane ka jingthmu ban buh da ki kor CCTV ka long ym tang ban khmih ïa ka jingdheng kali ha kitei ki bynta hynrei ka dei ruh kum shibynta ban khmih ïa ka bha-ka miat jong ki paidbah nongïaid-nongïeng ha ki lynti- syngkieñ.
“Kane kan long ka jingïarap khamtam ïa ki pulit pynïaid kali ba ngin lah ban ïohi ïa ka rukom kitkhlieh jong ki bad ïa ki paidbah ruh ba kin pyndep ïa ka kamram jong ki. Na ka bynta ki paidbah, kane ka long ka jingmana kaba tyngeh bad kum u MLA bad ki Dorbar Shnong, ngin sa shim da ka rai kaba tyngeh lada ki paidbah ne ki nongñiah taksi kim treh ban ïatreilang na ka bynta ka jingsuk jong kiba bun balang,” ong u Bah Adelbert.
Ha katei kajuh ka sngi, na ka liang u nongmihkhmat u la leit ban jurip ruh ïa ka Jaïaw Pdeng ha ka jingïadonlang u Rangbah Shnong ka Jaïaw Pdeng bad ka Jaïaw Mawbynna ha kaba kane ka jingleit jurip ïa kine ar tylli ki jaka ka dei namar ba ki don ki por ba ki nongñiah taksi kamai kim don satia ïa ka jingburom ïa ki pulit pynïaid kali ne ïa ki Home Guard bad kim don satia ïa ka mynsiem ban pyrkhat lem ïa kiba bun balang hynrei ki la pyrkhat tang ka jingïoh jingmyntoi ïalade shimet.
Kumta, na ka liang u MLA bad ki Dorbar Shnong ki la shim da kawei ka rai kata ban pyntreikam noh da ki kor CCTV khnang ba yn lah ban weng shisyndon ïa kine ki jingeh baroh ha ryngkat ka jingïatreilang ruh hapdeng ki paidbah bad ki pulit pynïaid kali.
“Nga kyrpad bad kyntu ïa ka tnat pulit ba kin long kiba shlur bad ban trei hok ïa ka kam bad ngim kwah ïa kane ka kyntien kaba don ba ong mano-re-mano ba ‘Ha Ri lajong ngin leh katba mon’ hynrei ngin hap ban pynduh jait namar kane ka long kaba pynhiar dor ïa ka jaidbynriew jong ngi,” bynrap u Bah Adelbert.
U Bah Adelbert u la pynkut ruh da kaba ong ba lada kane ka sienjam kam weng ïa ka jingdheng kali ha katei ka bynta, na ka liang ka jong u, ki Dorbar Shnong bad kumjuh ka tnat pulit pynïaid kali kin ym ailad shuh ïa ki kali ban pynhiar bad kyntiew ïa ki paidbah nongshong kali na ka lad ban rung shapoh ka Mission Compound hadien habud.
