Shillong, Ïaïong 27
Ka ‘Faith Foundation’ ka la pynlong ïa ka prokram ai jinghikai ban ïada ïa ki khynnah na ki jingma bad ki jingshah banbeiñ ha ka 25 tarik u Ïaïong, 2025 lyngba ka prokram kaba la ai kyrteng ‘Guardians For Child Safety: Schools Leading The Way’ halor phangpdeng ‘A Safe Child Is A Happy Child’ kaba la pynlong ha Bosco Integrated Development Society (BIDS), Nongshiliang kaba don hajan ka Nongthymmai.
Ka thong jong kane ka prokram ka long ban pynïajan bad pynïadei ïa ki skul ha baroh kawei ka Jylla bad ban ai jinghikai halor ka jingdonkam ban ai jingïada ïa ki khynnah na kino-kino ki jingjia ki bym shngaiñ ha ka jingim jong ki kaba manla ka sngi.
Ka phangpdeng jong kane ka prokram ka don ïa ka thong kaba kongsan ban buh ïa ki khynnah ha ka jingshngaiñ khnang ba kin san kin roi ha ka jingkmen bad ka jingkoit-jingkhiah khnang ban ïada ïa ki khynnah na ki jingma, ki jingshah banbeiñ ne ha kino-kino ki jingjia ki bym long shngaiñ naka bynta jong ki.
Ha kajuh ka por, ka pynshlur ruh ïa ki kmie-ki kpa jong ki khynnah, ki nonghikai bad ki nongshong-shnong ba kin ïatreilang ban sngap ïa ka jingeh jong ki khynnah, ban ai ha ki ïa ka jingsngewshngaiñ lada ki don hangno-hangno khnang ba kin kmen bad ba kin lah ban san-ban roi haka jingim jong ki khlem kino-kino ki jingsngewsih.
Ha kane ka sngi, ka Agatha Sangma kaba dei ka Shongknor jong ka Meghalaya State Commission for Protection of Child Rights (MSCPCR) ka la long kum ka kongsan ha ka jingïadon ryngkat lang bad ka Additional Deputy Commissioner ka East Khasi Hills District, Prettylisa K. Sangma kaba la ai ka jingbatai halor ka ‘Faith Foundation’ bad ka Kong Peacefully Marsharing pat kaba la ai jingbatai halor ka prokram bad la ïoh ruh ban pynsngew ïa ka jingdon ki khynnah ha ka Jylla kiba la shah ban beiñ ne shah thombor.
Haba ai jingkren ha katei ka prokram, ka Shongknor jong ka MSCPCR, ka Agatha Sangma ka la batai ïa ki kyndon jong ka 2021 National Commission for Protection of Child Rights kaba pynleit jingmut ha ka jingshngaiñ jong ki jingtei, ka koit ka khiah, ka jingbha jingmiat, bad ka jingïada na ki kor-ki bor ka juk mynta jong ki khynnah.
Ka Sangma ka la ban jur ruh ïa ka jingdonkam ïa ki jaka kiba shngaiñ, ki jingpeit bniah ïa ka koit ka khiah manla ka por, ki komiti ki ban pyrshah ïaka jingshah lehbeiñ, bad ka jingkyrshan ha ka bor pyrkhat jong ki khynnah.
Shuh-shuh, ka la kren ruh shaphang ki jingma kiba ïadei bad ki kor-ki bor ka juk stad mynta, da kaba kyntu ïa ki skul ban ai jinghikai ïa ki khynnah skul shaphang ka jingkren beiñ lyngba ki kor internet bad ki rukom treikam kiba shngaiñ ha ka internet.
Ka Sangma ka la pynpaw ïa ka jingbym don jong ki seng jong ki kmie ki kpa bad ki nonghikai ha kiba bun ki skul bad ka la kyntu ruh ïa ki ban thaw ïa ki khnang ba yn lah ban buddien ïa ka jinglong-jingman jong ki khynnah.
