Shillong, Ïaïong 27
U President ka National People’s Youth Front (NPYF) uba dei u MLA na Jowai, Bah Wailadmiki Shylla u la ong ba napdeng ki 8 ngut ki MDC ka Voice of the People Party (VPP) ha Jaiñtia Hills Autonomous District Council (JHADC) bun ki dei kiba la jop da ka jinglah nalade shimet ïa ka ilekshon ba dang shu dep mynta u snem, ym ha ka kyrteng jong ka VPP.
“Haduh mynta ïa ka Executive Committee ha JHADC la ïalam da ka NPP. Shuh-shuh na ki 8 ngut ki MDC ka VPP kiba jop ïa ka ilekshon, ba bun ki dei kiba jop da ka jinglah nalade shimet ym ha ka kyrteng ka seng,” la ong u Nongïalam ka NPP haba kren bad ki lad pathai khubor ha ka sngi Saitjaiñ.
Haba kubur ba ka VPP ka don ïa ka lyer ha ka ilekshon, u Bah Shylla u la ong ba hashwa ka ilsekshon MDC haba peit la i kumba ka VPP kan sar naphang ha Jaiñtia Hills kham palat ban ha Khasi Hills, hynrei haba la mih ka resol, ka VPP ka jop tang 8 ngut ki MDC bad haduh mynta ïa ka Executive Committee ha JHADC la ïalam da ka NPP.
“Lada phi ïohi ïa ka resol mynshem snem (MP), ym artatien ba ka VPP ka don ïa ka lyer. Haba peit ïa ki khubor hashwa ka MDC ilekshon ruh, kiba bun ki briew ki pyrkhat ba ka VPP kan sar ha Jaiñtia Hills kham palat ban ïa kaba ha Khasi Hills, hynrei hadien ba la pynbna ïa ka resol ngi ïohi ba ka VPP ka jop tang 8 ngut ha JHADC,” u la ong.
U Bah Shylla u la ong ba ki don ki briew kiba peit ïa ka VPP kum da kawei ka lad, bad namar mynta ki don ïa ka bor synshar ha Khasi Hills Autonomous District Council (KHADC), ki paidbah kin peit bad kin bishar ïa kaei kaba ki la kular ba kin leh na ka bynta ki paidbah.
“Namar mynta ki don ïa ka bor synshar ha Khasi Hills, te gin ïapeit ki ruh ki la ïoh ban synshar bad ngi kyrmen ba kin lah ban trei haba ki la ïoh ïa ka jingpynkup bor. Ngi don hangne ban trei ngin trei ïa kaei kaba ngi lah ban shkri na ka bynta u paidbah,” la ong u Nongïalam ka NPP, haba pynpaw ka jingkitbok ïa ka VPP ba kan lah ban leh kumba ka la kular sha u paidbah.
