Jowai, Ïaïong 27
Duna lai spah ngut ki briew kiba don ka jingshitom ha ka met ka jong ki, ki la tuid sha ka jingai jingsumar ei ne Free Health Camp bad ki la ïoh mad ïa ki jingkyrkhu na katei ka camp.
Ïa kane ka jingai jingsumar ei la pynlong da u MDC ka Jowai North u Ma Awhai Andrew Shullai ryngkat ka jingïatreilang bad ka Down Town Hospital, Guwahati ha Community Hall ka Lion Mission Compound Dorbar Shnong, Jowai ha ka 26 tarik mynta u bnai.
Ha kane ka sngi, ki doktor na ka Down Town Hospital, Guwahati ki la ai jingsumar ïa kiba bun jait ki jingshitom kynthup ka jingshitom ha u klongsnam, kiba ïadei bad ki kynthei kumjuh ki khynnah, ki bniat, shyieng nalor kiwei kiwei ki jait jingshitom.
Ki nongïoh jingmyntoi ki la pynpaw ka jingsngewkmen bad ka jingsngewnguh ïa u Ma Awhai Andrew Shullai halor ka jingpynlong ïa kane ka jingai jingsumar ei kaba la pynmyntoi haduh katta katta ïa ki paidbah kiba wan na ki longïing ki longsem khamtam kiba kham duna ka ïoh ka kot.
Haba ïadei bad kane ka sienjam ban kner la ki kti ban ïarap ïa ki briew kiba pang ba shitom, u Ma Awhai Andrew Shullai u la ong, kum u nongmihkhmat paidbah u sngewthuh kham bha ïa ka jingkordor jong ka jingkoit jingkhiah bad u khmih lynti ruh ba kane ka camp kan ïarap ïa ki paidbah ban phikir ïa la ka jong ka met ka phad.
U la pyntip ruh baroh kiba wan phah sumar ha kane ka sngi, kin ïoh ïa ka ‘discount card’ kaba 10% kaba yn ai da kane ka hospital lada ki leit shah sumar ha kane ka hospital.
