Shillong, Ïaïong 27
Ka kynhun Shillong Citizens Forum (SCF) ha ka janmiet ka Sngi U Blei ka la pynlong ïa ka jingthang mombati ha Khyndailad kum ka dak ban pynrem jur ïa ki lehnoh na Pakistan kiba la siat ïap ïa ki ‘riew paidbah ha Pahalgam, Jammu & Kashmir ha kaba haduh 28 tylli ki mynsiem ba lui-lui ki la duh noh.
Ha kane ka jingthang mombati la sakhi ba da ki bun spah ngut ki nongshong shnong ka nongbah Shillong na ki jaidbynriew bapher bapher ki la wan ban ïashim bynta kum ka dak ban pynrem jur ïa ka jingjia ha Pahalgam bad ha kajuh ka por ban phah ruh ïa ka jingsngewlem sha kiba bahaïing bahasem jong kito kiba la khlad noh.
Katba ka jingthang mombati ka dang ïaid, ki paidbah kiba la wan ban ïa shim bynta ki la pynlong ïa ka jingpyrta pyrshah ïa ka ri Pakistan bad ki da rah ruh ïa ki jingthoh ban pynrem ïa katei ka jingjia bad kyntu ïa ka Sorkar Pdeng ban pynshitom da kaba tyngeh ïa kiba donkti ha kane ka kam runar.
Ha kane ka sngi la ïoh ruh ïa ki jingkren na baroh ki kynhun jaidbynriew, ha la ki jong ki jong ki ktien ban pynrem ïa katei ka jingjia.
