Shillong, Ïaïong 27
Ka Sorkar Jylla ka la ai por biang ïa ka kompeni shna surok na Mawlai By-pass shaduh Bhoi-rymbong ba kan pyndep hapoh u bnai Nohprah, 2025.
Ka jingai por ka Sorkar Jylla ïa ka kompeni MS Abhoy Charan Bakshi Purba Mendin-pur, West Bengal, Kolkata ka dei ba ki la pynbor namar kam lah ban pyndep katkum ka por ba la buh namar sa tang katto-katne bnai la sdang sa ka aïom slap.
Ïa kane ka surok la sdang ban shna na Mawlai By-pass ban poi sha surok Bhoirymbong kaba dei ka surok Shillong By-pass ha ka jinglut kaba T.34 klur kaba jngai kumba 14.279 kilometre kaba la mang pisa da ka North East Special Infrastructure Development Scheme jong ka Sorkar India katba ïa ka san kilometer kaba jan poi sha Bhoirymbong la mang na ka skhim CRF.
Kum ban shu pynkynmaw, ha ka 22 tarik mynta u bnai u Dr. Ricky Syngkon, MP ka Shillong ryngkat bad u MLA ka Mawlai konstitwensi, Bah Brightstarwell Marbaniang ki la leit ban jurip ïa kane ka surok kaba la dep siang rong haduh san kilometre.
Katkum ka jinglap ha ka por ba ki la leit ban jurip ïa kane ka surok, ka jingpyntrei ka la long kumba 70 persen bad ki bym pat pat siang rong ka kompeni ka la dep shna lut ïa ka surok khyndew haduh Bhoirymbong bad kaba sah mynta ka long ban siang rong bad shna ïa ki nala.
Ka jingthmu jong ka Sorkar Jylla ban shna ïa kane ka surok ka dei hadien ba ka jingkieng Umïam ka la shong synjor kat haduh ba ym shah shuh ban ïaid ïa ki trok hynrei ka Sorkar ka don jingkyrmen ba ynda la dep kane ka surok kan sa pynsuk ïa ki trok ban ïaid na kane ka surok ban leit pynhap pat ïa ki mar sha nongbah Shillong.
