Geneva, Iaiong:
U heh ka tnat World Health Organization (WHO) ha ki khyndiat sngi ba la leit jong ka taiew ba la lah,u la pynbna ba ka tnat ka la hap ban pynduna noh ia ki kam bad ki dkhot nongtrei jongka nangne shakhmat, namar ka jingbym lah shuh jong ka tnat ban pynmih pisa hadien ka jingpynsangeh jong ka United States ia ki lad jingiarap bad ki jingnoh synñiang sha katei ka tnat.
U Tedros Adhanom Ghebreyesus u la ong ba ka jinghiar ba khraw ha ka liang ka ioh- ka kot jong katei ka tnat mynta, ka la pynlong ia katei ka tnat ba kan shim noh da kane ka rai naba ym don lad shuh da kumwei pat.
Kumjuh ruh ka tnat United Nations ka la pynpaw ia ka jingsngewkhia kaba jur naduh ba u President ka US- u Donald Trump u la pynbna lypa ba ka US kan pynsangeh noh ia ki pisa noh synñiang sha katei ka tnat ha kine ki khyndiat por ki ban wan.
Ka United States ka la dep noh synñiang $1.3 Billion sha ka WHO naka bynta ka mang tyngka ia u snem 2022-2023 hynrei la ong ba ha kane ka kynti pat ka US ka la pynpaw ba kam lah shuh ban ai jingkyrshan ia kitei ki tnat jong ka pyrthei.
