Shillong, Ïaïong 27
Ka Farmers’ Front jong ka National People’s Party (NPP) ka la rai ban kyrpad ïa ka Sorkar Jylla ba kan pynkiew noh ïa ka dor u synsar, ban leh eiei halor ka jingbam khñiang ki shylluit dieng kwai bad ban pynkhlaiñ ruh ïa ka jingïalap sha ki nongrep halor ka CM Assure scheme.
Haba kren sha ki lad pathai khubor hadien ka jingïalang, u Nongaiktien ka NPP, Bah Himalaya M Shangpliang u la ong ba katkum ka jingïathuh ki nongrep, ka dor u synsar ka la hiar bha bad ka dor ba la buh da ka Sorkar ka long kaba rit palat.
U la ong ba ha ka jingïalang kaba la long ha ka sngi Balang la rai ban leit ïakren ïa ka Sorkar ba kan pyrkhat biang ïa ka dor jong u synsar bad lada lah, ban pynheh noh ïa ka dor.
“Ka dor jong u synsar Grade-I la buh T.55 shi kilo, Grade-II ha ka dor T.40 bad Grade-III ha ka dor T.30 shi kilo,” u la ong.
U Bah Shangpliang u la ïathuh ba la rai ruh ba ïa ka jingbuh pud ban thied 800 kilo u synsar dei ban pynheh noh ba kan long palat ïa ka 1000 kilo na uwei u nongrep, namar ki don nongrep synshar kiba rep bad pynmih palat ïa ka 2000-3000 kilo.
“Lada ki ong ba u pud u long tang 800 kilo, ka jingkylli ka long ba kin leh aïu pat ïa u synsar uba sah?,” u la ong.
U Bah Himalaya u la ong ruh ba ka NPP Farmers’ Front ka la rai ban leit pynsngew ïa kane ha ka Sorkar ba kan pyrkhat biang.
Ha kajuh ka por u la pyntip ba ka Framer’s Front kan leit kyrpad ïa ka tnat ka Rep ka Riang ba kin shim khia mar-mar ban tehlakam ïa ka jingpur jong ka jingpang bam khñiang ki shylluit dieng kwai bad ban ai jingïarap ruh ïa ki nongrep kwai.
“Kumba long mynta, ka jingbam khñiang ki shylluit dieng kwai kam pat duna satia. Ka jingbam khñiang ka la nang roi. Ki Nongrep kiba la wan na West Khasi Hills bad South West Khasi Hills, ki la pyntip ba ki dang don bun ki jingjia bam khñiang, kiba pynïap tram ïa u dieng kwai,” u la ong.
Haba pynpaw ïa ka jingdon jong ka CM ASSURE scheme ba la ai sha ki nongrep kwai, u Nongïalam ka NPP u la ong ba kin sa leit ïalap sha ki nongrep kwai khnang ba kin lah ban ïoh ïa kane ka skhim.
Haba pynpaw ïa ka jingkongsan ka CM ASSURE scheme, u Bah Shangpliang u la ong ba ka la don ka jingslem ha ka jingpynrung kyrteng ïa ki nongrep hapoh kane ka skhim bad ka seng ka la rai ban kyrpad ïa ki bor ba dei khmih ba kin sngewbha ban pynsted noh ïa ka jingpynrung kyrteng.
U la ong ba kiba bun ki nongrep kim pat tip ïa kane ka skhim, bad kane ka dei namar ki don ruh kiwei ki bor bad ki daw kiba pynlong ïa ki nongrep ban sngew sheptieng ban shim ïa kane ka skhim ba lehse ki lah ban ym ïoh ïa ka pisa ha ka por kaba biang.
“Ngi la kren shai bha sha ki nongrep ba shisien ba ki nongrep ki la pynrung kyrteng, ïa ka pisa la pyllait mar mar,” u la ong.
Haduh ka 21 tarik Ïaïong, haduh 5657 ngut ki nongrep ki la pynrung kyrteng ïalade hapoh ka CM ASSURE scheme.
