Nongstoiñ, Ïaïong 27
Ka shlem trei kam jong ka District Sports Officer (DSO), West Khasi Hills ka la pynkut noh ïa ka 30th West Khasi Hills District Level Inter School Athletic Meet 2025 ha ka sngi Thohdieng ha kaba ka St. Peter’s Higher Secondary School ka la rah ïa ka nam ‘Overall Champion’.
Ha kane ka lympung ïalehkai kaba la neh lai sngi lynter ïa kaba la pynlong ha Nongpathar Outdoor Stadium Pyndengrei, ïa ka nam jop ha ka March Past la ïoh ban rah da ka Mount Hermon Academy SS Nongstoiñ, katba ïa ka kyrdan ba-ar la ïoh da ka Nongstoiñ College HS Section.
Ïa ka nam Best Athlete ha Under-14 ki shynrang la rah da u Lucky John Lyngkhoi na ka Bethel Presbyterian SS, katba ha ka liang ki kynthei la ïoh da ka Mercyfull Umïong na ka Borsingh Memorial Secondary School.
Shuh shuh ïa kajuh kane ka nam ha ka Under-16 ki shynrang la ïoh da u Wanteikyrpang Marbanniang na ka Sibsingh Memorial Government HSS Nongstoiñ, katba ha ka liang ki kynthei la ïoh da ka Dolly Lyngdoh Nonglait na ka Donbosco Secondary School Mawkhlam.
Ha ka Under-18 ki shynrang ïa kane ka nam best Athlete la ïoh ban rah da u Pynshaimanik Kharbani na ka Sibsingh Memorial Government HSS Nongstoiñ, katba ha ka liang ki kynthei la ïoh da ka Ioris Syiem na ka Mawrang Secondary School Mawrang- Rambrai .
Haba phai pat sha ka nam Best Team ha ka Under-14 jong ki shynrang la ïoh da ka Nongstoiñ Public Secondary School, katba ha ka liang ki kynthei la ïoh ban khur da ka Borsingh Memorial SS.
Ha ka Under-16 pat ïa ka nam Best Team ha ka liang ki shynrang la ïoh ban khur da ka St. Peter’s HSS, katba ha ka liang ki kynthei la ïoh da ka Mawrang SS, Mawrang – Rambrai. Ha ka liang ka Under-18 ïa ka nam Best Team la ïoh da ka Sibsingh Memorial Government HSS, katba ha ka liang ki kynthei la ïoh da ka Mawrang SS, Mawrang-Rambrai.
Ha katei ka sngi pynkut la ïadon lang ka Sports Officer na ka tnat ïalehkai jong ka Sorkar Jylla Kong Darlene M. Khonglam ha ryngkat ka jingdonlang ruh ka DSO Kong Balarina Syiem, ki nonghikai, ki headmistress, principal na ki skul bapher bapher kiba la sam ruh ïa ki khusnam bad kiwei-kiwei.
