Shillong, Ïaïong 27
Ka Mawngap District Christian Multipurpose Higher Secondary School ha ryngkat ka East Khasi Hills District Chess Association ka la pynkut noh ïa ka lympung ïalehkai chess ba la tip kum ka Mawphlang Block School Chess Tournament 2025 na ka bynta ki khynnah skul kiba hapoh 13 snem bad 13 snem shaneng ha ka sngi Saitjaiñ hapoh jong katei ka skul kaba don ha Mawngap.
Ha kane ka lympung la wan shim bynta da 215 ngut ki khynnah na ki 11 tylli ki skul kiba kiba hap ka Mawphlang Block bad la kyrshan lang ïa kane ka lympung da ka State Council of Science Technology & Environment (SCSTE).
Kane ka lympung ïalehkai chess ka la long kaba kiew stet bha hapoh jong kane ka block namar tang ha kine ki shi snem tam ki la mih bun ki khynnah kiba don ïa kane ka sap ba kyrpang ha kane jingïalehkai bad ruh ka jingshim khia da ki skul bapher-bapher ban ïashim bynta shitrhem ha kane ka jingïalehkai. Te kumta ka jingpynlong ïa kane ka lympung ïalehkai ha kine ki ar sngi ïa kaba la sdang naduh ka 25 tarik u Ïaïong 2025 ka la long ka jingmyntoi kaba khraw ba ki dang ïoh shuh-shuh ïa ki buit ïalehkai.
Napdeng kine ki khynnah kiba la wan shim bynta, na ka liang ka East Khasi Hills District Chess Association ka la jied sa tang 40 ngut ki khynnah kiba kham tbit na kane ka block ba kin mihkhmat sha ka State Level Inter School Chess Tournament ka ban sa long shen.
Ha kane ka sngi pynkut ïa kane ka lympung la ïadon lang u Bah Shaphrang Sawkmie, Assistant Research Officer ka SCSTE kum kongsan, kumjuh u Bah L. Diengdoh, Program Officer ka SCSTE, Ka principal Kong J. Thabah, kumjuh ki dkhot jong ka East Khasi Hills District Chess Association, ki nonghikai jong baroh 11 tylli ki skul lem bad ki khynnah skul. Ha kane ka sngi la sam ruh ïa ki khusnam lyngba ki takma, ki trophy lem bad ki song pisa sha baroh ki nongjop kiba la wan hapoh ka thup kaba shiphew.
Ki khynnah kiba la wan ha ka thup shiphew ha ka U-13 Boys ki long u Eddyson George Kurbah, Ezekiel Rynjah, Habanjop Wardkhar, Dedrick Khyriem, Raymondky Langstieh, Hameshwa Khonglah, Wilbert Sad, Aibannangkiew Rymbal, Damewanbha Kurbah bad u Badapkupar Kharwar. Katba ha ka liang ki kynthei ki long ka Alishabakor L. Marshillong, Philapynkmen Khyriem, Larisha Dohling, Bahunhaki Langstieh, Emidahun Kurbah, Badriti Lyngoodh, Rosemary Schlang, Twinkle Kharlyngkhoi, Bajakmen Langstieh bad ka Ditoza Kurbah.
Ha ka Above-13 Boys ki khynnah kiba la don hapoh ka thup kaba shiphew ki long u Cleverson Kharbhih, Damelawanshwa Rapthap, First Star Disiar, Damanbha Pathaw, Banteibok Khyriem, Kelbinstar Dohling, Reynald Kharkongor, Pherdonal Lawriniang, Gadmiel L. Mawphlang bad u Ferdison Langstieh. Katba ha ka liang ki kynthei ki long ka Idawanaka L. Marshillong, Deisaphibanbet Synshong, Catherine Kerdalin Thabah, Rishtag Momin, Phindamanbhal Marshillong, Philari Mawlong, Faithful Rynjah, Rihuniaphil Mawphlang, Naomil Mawphlang bad ka Japhidarihun Giri Kharshiing.
