New Delhi, Ïaïong 27
Ka China ha ka Sngi U Blei, ka la kyrshan ïa ka paralok ba marjan jong ka, ka Pakistan, ha kaba ïada ïa ka jinglong trai ri bad ka jingshngaiñ jong ka, namar u Myntri kam bar ri, u Wang Yi, u la khot ïa ka New Delhi bad ka Islamabad, ba kin khang ne pyntieng, hadien ka jingshah thombor jong ki lehnoh ha Pahalgam.
Ha ka jingïakren phone bad u paralok jong u na Pakistan, u Ishaq Dar, u Wang u la ong ba ka China ka bud ryntih ïa ki jingjia hadien ka jingshah thombor bad kyrshan ïa ka “jingtohkit kaba khlem liang” halor kane ka jingjia, katkum ka jingpule na ka tnat kam bar ri jong ka China.
Kane ka jingkren jong u Wang ka la wan ha ka por jong ka jingjur ka jingïakynad hapdeng ka India bad ka Pakistan hadien ka jingshah thombor jong ki nongjngohkai pyrthei ha ki lehnoh ha Pahalgam ha ka 22 tarik mynta u bnai, ha kaba 28 ngut ki briew ki la shah pynïap. Ïa kane ka jingthombor la kam da ka ‘The Resistance Front’ kaba dei ka proxy jong ka Lashkar-e-Taiba kaba don ha Pakistan.
Ka India ka la pynbna shibun ki lad pynshitom pyrshah ïa ka Pakistan, kynthup ïa ka jingpynsangeh ïa ka jingïateh soskular jong ki um Indus bad ka jingkhang ïa ka jaka ïaid khappud kaba treikam tang kawei ha Attari.
Ka Pakistan ka la ong ba kano-kano ka jingpynsangeh ïa ki um jong ki wah yn ñiew kum ka “jingleh thma” bad ka la pynpaw ïa ki lad jingïakhun kum ka jingkhang ïa ka jaka suiñ jong ka sha ki liengsuiñ India bad ka jingpynsangeh ïa baroh ki khaïi pateng.
“Ka China ka ju kyrshan ïa ka Pakistan ha ki kam pyrshah ïa ki lehnoh. Kum ka paralok ba skhem bad ka paralok ba ïadei bad ka jinglong jingman, ka China ka sngewthuh bha ïa ki jingeh ba ïadei bad ka jingshngaiñ jong ka Pakistan bad ka kyrshan ïa ka Pakistan ha kaba ïada ïa ka jingsynshar bad ki jingmyntoi ba ïadei bad ka jingshngaiñ jong ka,” la ong u Wang.
Ka China ka dang peitngor bha ïa ka jinglong jingman kaba mynta bad ka kyrshan ïa ka jingtohkit kaba khlem liang katba lah kloi, ong u Wang.
Ka jingïakynad kam dei ha ka jingmyntoi ba kongsan jong ka India bad Pakistan, lane kaba ïarap ïa ka jingsuk bad jingshong suk ha ka thaiñ, bad baroh ar tylli ki ri ki dei ban “pyndonkam ïa ka jingpynïaid, ban ïakynduh iwei ïa iwei pat shiteng lynti bad ban pynjai jai ïa ka jinglong jingman”, u la ong.
U Dar, Symbud Myntri Rangbahduh jong ka Pakistan, u la pynshai ïa u Wang, halor ka jingeh hapdeng ka Pakistan bad ka India, halor ka jingshah thombor jong ki lehnoh bad ong ba ka Islamabad, ka ju long kaba skhem ha kaba ïakhun pyrshah ïa ki kam lehnoh bad “pyrshah ban shim ïa ki sienjam, kiba lah ban ïalam sha ka jingnang khluit jong ka jinglong jingman”, la ong ka jingthoh jong ka China.
U Dar u la ong ba ka Pakistan ka angnud ban pynïaid ïa ka jinglong jingman ha ka rukom kaba la rangbah bad kan pynneh ïa ka jingïakren bad ka China bad ka pyrthei.
Ka tnat kam bar ri jong ka Pakistan, ka la ong ha ka kyrwoh ba u Dar u la kyntait ïa ka “jingleh shiliang bad be-aiñ” jong ka India bad “ka jingpynbna khlem nongrim jong ka pyrshah ïa ka Pakistan”.
U Dar u la pynpaw ruh ïa ka “jingsngewnguh ïa ka jingkyrshan ba ïaineh bad bym ju artatien jong ka China” bad pynskhem biang ïa ka jingkular ba skhem jong ka Pakistan ïa ka jingthmu ba ïasam lang jong ka jingïatreilang kaba donkam ha baroh ki por,” ong ka kyrwoh.
“Baroh arliang mamla ki la pynpaw biang ïa ka jingkut jingmut ba skhem jong ki ban pynneh ïa ka jingsuk bad jingshong suk shongsaiñ ha ka thaiñ, ban kyntiew ïa ka jingburom bad jingsngewthuh jingmut markylliang, bad ban pyrshah lang ïa ki polisi synshar shiliang bad ki polisi synshar paidbah,” ka la ong.
Ym shym la don kano-kano ka jubab na ki heh Sorkar India halor ki jingkren jong ki Myntri kam bar ri jong ka China bad Pakistan.
Ha kine ki khyndiat sngi ba la dep, u Jaishankar bad u Narendra Modi, Myntri Rangbahduh jong ka ri, ki la ïakren bad katto-katne ngut ki Nongïalam jong ka pyrthei, kiba kynthup ïa u President jong ka US, Donald Trump, u President jong ka France, Emmanuel Macron, u President jong ka Iran, Masoud Pezeshkian bad u Keir Starmer, Myntri Rangbahduh jong ka UK, halor ki kam lehnoh bad ka jingthombor jong ki lehnoh ha Pahalgam. Ki Nongïalam jong ka pyrthei ki la pynrem jur ïa katei ka kam thombor bad ki la pynpaw ban snohkti lang bad ka India.
