Tura, Ïaïong 27
Ka Achik Students’ Welfare Association (ASWA) ka la thoh sha u Myntri Rangbah ka Jylla bad Myntri ka tnat Pule-Puthi ban pynpaw ka jingsngewkhia halor ka jingpynrung kam ka ban sa wan na bynta ka ‘Assistant Professor’ sha ki kolej Sorkar jong ka Jylla.
Ka seng ka la kyrpad na bynta ka jingbud ryntih ïa ki kyndon ka UGC ha kaba ïadei bad ka jingpynrung kam, bad kyrpad ruh ban thung ym tang ïa kito kiba don ïa ki kyrdan pule ba la pan katkum ki kyndon thung kam, hynrei kiba don ïa ka mynsiem ba shisha ïa ka kam hikai.
Ka jingpynrung kam na ka bynta kitei ki jaka ba thylli yn sa leh lyngba ka Meghalaya Education Recruitment Board (MERB).
“Ngi kyntu jur ïa ka Sorkar ban pyntikna ïa ka jingbud ryntih kaba khlem ïa-peiñ ïa ki kyndon ka University Grants Commission (UGC) halor ka ‘Minimum Qualifications for Appointment of Teachers and Other Academic Staff in Universities and Colleges and Measures for the Maintenance of Standards in Higher Education, 2018’. Kine ki kyndon ki buh ïa ka nongrim kaba donkam ban pynneh ïa ka jingbha bad jingtbit ha ki jaka pule ba kham halor jong ngi,” ong ka seng.
Ka ASWA ka la bynrap ha ka jingkyrpad jong ka da kaba kdew ba ïa ka jingpynrung kam dei ban leh palat nalor ka jingbud ryntih ïa ki kyndon.
“Ngi sngewkhia halor ka jinglah ban thung ïa ki briew kiba lah ban pyndep ne don ïa ki jingdonkam ba duna tam lyngba ki kot ki sla, hynrei ki bym don ïa ka mynsiem ba shisha, ka jingaiti lut bad ka jingtbit ban hikai bad wad bniah. Ngim kwah ïa ki nonghikai da kaba shu jia ryngkhat, kiba wad kam tang na bynta ban im hynrei ïa ki nonghikai kiba aiti lut,” ki la bynrap.
Ki la kyrpad ïa ka MERB ba kan pyntreikam ïa ka rukom jied kaba bishar bniah ym tang ïa ka jinglong hok ban ïoh, hynrei wat ïa ka jingthrang kaba shong nongrim jong u/ka kyrtong, ban hikai ïa ka ‘Philosophy’, ka jinglah ban nang bteng ban pule bad ka jingaiti lut na bynta ka jingpule kaba paka.
“Ngi ban jur halor ka jingdonkam ba kongsan ban thung tang ïa ki briew kiba trei hok, kiba aiti lut, kiba pyni ïa ka jingdon mynsiem kaba paw ha ka jinghikai bad jingwad bniah, bad kiba aiti lut na bynta ka jingroi ba bteng ha ka kam ka jam. Kine ki dei ki nonghikai ki ban noh synñiang shisha, ban tei ïa ka jinglong-jingman ba shit rhem ha ka jingpule ha ki kolej Sorkar jong ngi,” ki la bynrap da kaba kyrpad ïa ka Sorkar ban buh hakhmat eh ïa ka jingtbit, ka jingdon mynsiem ban hikai bad ka jingaiti lut haba phai sha ka jingpynrung kam ban wan na ka bynta ki Asst. Professor.
