Shillong, Ïaïong 27
Ka 16 tarik mynta u bnai kan dei ka sngi kaba kmen tam na ka bynta kawei ka longïing bad kumjuh ïa ka jylla hi baroh kawei. Ha kane ka sngi la lap pat ïa uwei u khynnah samla uba la jah na Bengaluru naduh ka step jong ka 12 tarik mynta u bnai.
Ïa une u samla ba la tip kyrteng kum u Welcome Rasmut uba dei na ka shnong Ummulong, Jowai, la lap na ka jylla Tamil Nadu ha ka janmiet jong ka 16 tarik.
Katkum ka kyrwoh khubor na u President ka KSU Bengaluru Unit u samla Donboklang Nongphud, u la ïathuh ba une u khynnah uba jah na Bengalaru u dei uba dang don 16 snem ka rta bad une u khynnah u la jah na Kammanahalli, Bengaluru, Karnataka.
Ïa utei u khynnah la lap biang ha ka 16 tarik Ïaïong na Tamil Nadu da uwei u Pastor bad ki paralok jong u, uba la ïarap ban leit buh ïa u hapoh ka jingpeit jong ka Child Welfare Committee (CWC) Krishnagiri, Tamil Nadu, bad ïa une u khynnah la aiti noh sha ki bahaïing jong u ha Bengaluru ha ka 25 tarik Ïaïong 2025.
Ka jingjah jong u Welcome Rasmut ka la pynlong ïa ki bahaïing bahasem bad ki paralok jong u ban syier mynsiem bad sah ha ka jinglyngngoh. Ïa utei u khynnah la ïohi khatduh ha ka step 12 tarik u Ïaïong, 2025 hadien ba u la mih na ïing sah jong u ban leit mareh step bad la suba ba u la bakla lynti. Ka jingbym lah ban ïoh jingtip halor ka jingjah jong u, ka la pynlong ïa ki bahaïing bahasem ban phah khubor sha ki pulit bad na ka liang ka seng ruh ka la phah ki khubor sha ki lad pathai khubor bad ruh ha ki rynsan social media.
Lyngba ka jingïatreilang kaba janai jong shibun ki seng bad ki riewshimet, la ïoh khubor ba une khynnah u la poi sha Tamil Nadu. Uwei u pastor uba lap ïa u, u la shimkhia bad u la pynpoi ïa u sha ka jaka ai jingsumar ïa ki khynnah ka Children Welfare Committee ha Krishnagiri Tamil Nadu, kaba la peit bad sumar bha ïa u haduh ba la ïoh pdiang noh da ki bahaïing jong u.
Ka jingjop ban ïoh biang ïa u Welcome Rasmut ka long ruh ka sakhi jong ka jingtrei shitom bad jingïatreilang kaba janai jong ki briew kiba ieit ïa ki para mynsiem bad kiba don ka jingkitkhlieh. Kine ki kynthup ïa Sir Ïada Martin Marbaniang, Pastor AS Nongrum jong ka KJCF Bangalore, ki paralok ba ïasah marjan, ka NPP Ummawlong Youth Wing, ka CWC Jowai, ki pulit na thanad Banaswadi, ryngkat ki bahaïing bahasem, kiba la shimkhia ban pynsaphriang ïa ka khubor wad jingtip bad ban wad jingïarap.
Ka jingai jingkyrshan na kine ki kynhun bad ‘riew paidbah ka la pyni ba ka jingïatylli bad ka jingïarap para briew ka long kaba donkam tam ha ka synshar paidbah bad ha ka jingïada ïa ki khynnah.
Ki bahaïing jong u Welcome Rasmut ki ai ka jingsngewnguh kaba khraw sha baroh kiba la noh synñiang, kiba la kynmaw lem ha ki jingduwai bad kiba la kyrshan lem ha kum kane ka por ba ki ïakynduh ïa ki jingeh, la pynkut ka kyrwoh na ka KSU Bengaluru Unit.
