Mawkyrwat, Ïaïong 27
Ka ophis jong u District Sports Officer (DSO) ka South West Khasi Hills District ryngkat ka jingïatreilang bad ka South West Khasi Hills Athletics Association (SWKHAA) ha ka 25 tarik u Ïaïong 2025 ka la pynhap pyrda noh ïa ka 11th South West Khasi Hills District Level Inter School Athletics Meet 2025 (SWKJDL-ISAM) ba la pynlong ha Rowell Lyngdoh Stadium, Mawlangwir, South West Khasi Hills District.
Lah ban kdew ba ka nam lahduh ha kane ka lympung ïalehkai ka dei ka Nativity Higher Secondary School Mawkyrwat. Ha ka liang ki kynthei ka la ïoh ban khur haduh 9 tylli ki takma ksiar, 6 tylli ki takma rupa bad 6 tylli ki takma rnong bad ha ka liang ki shynrang pat ka la ïoh ban khur 9 tylli ki takma ksiar, 7 tylli ki takma rupa bad 5 tylli ki takma rnong. Haba kheiñ lang baroh, ka Nativity Higher Secondary School ka la ïoh ban khur haduh 18 tylli ki takma ksiar, 13 ki takma rupa bad 11 ki takma rnong.
Katba kiba wan ba ar ha ka liang ki kynthei ka dei ka Jakrem Presbyterian Secondary School bad ka Sakwang Presbyterian Secondary School ki ba lah ïoh khur mar 2 tylli ki takma ksiar, 1 takma rupa bad 1 takma rnong.
Ha ka liang ki shynrang pat kaba wan ba ar kadei ka Presbyterian Higher Secondary School Mawkyrwat ka ba la ïoh ban khur 2 tylli ki takma ksiar, 2 takma rupa bad 3 tylli takma rnong.
Katba ha ka March Pass ïa ka nam ba nyng-kong la ïoh da ka Little Star Higher Secondary School, Mawkyrwat.
U kongsan ha katei ka sngi u dei u bah D.P. Muktieh uba dei u Executive Engineer jong ka ophis Water Resource, South West Khasi Hills District kum u kongsan ha ryngkat ka jingïadonlang u bah Damang Syngkon, District Sports Officer ka South West Khasi Hills District, u Bah B. Kharjana, MPS, Additional Superintendent jong ki Pulit ka South West Khasi Hills District, u Bah L.T. Tariang, MCS, Additional Deputy Commissioner ka South West Khasi Hills District lem bad kiwei de kiba la shah khot sngewbha kynthup ïa ki nonghikai bad ki khynnah skul.
