Shillong, Ïaïong 27
Ka Meghalaya Energy Corporation Limited (MeECL) ka la pynjlan ïa ka One Time Settlement (OTS) skhim 2025, tat haduh ba kut u bnai Ïaïong ban khyllie pat ïa ki bai bording ilektrik bym pat siew da ki nongthang bording.
Haba pyntip ïa kane u Myntri ba khmih ïa ka tnat Bording ka Jylla, Abu Taher Mondal u la ong ba ha ka jingshisha ïa ka OTS scheme, 2025 la pyntreikam tang haduh ka 31 tarik Lber, hynrei haba ïohi ïa ka jingwan shakhmat ki nongthang bording, la pynjlan ïa kane ka skhim haduh ba kut une u bnai.
Ïa ka OTS la pyllait da u Myntri Rangbah ka Jylla, Conrad K Sangma ha ka 4 tarik Lber na ka bynta ki nongthang bording ba kin siew pynkhuid noh ïa ka bai thang bording sha ka MeECL.
Katkum ka jingpynbna jong u Myntri Rangbah, jan kumba 45000 ngut ki nongthang bording kin ïoh jingmyntoi bad palat T.26 klur ka kuna yn sa map noh.
Ki nongthang bording kin hap ban siew tang ïa ka trai ba 40% bad ïa ka 60% ba sah kin siew ha ki san sien ki ‘installment’ ba mar katjuh khlem ka sut.
Ka OTS scheme 2025 ka treikam tang ïa ki “Domestic Low Tension (DLT)” bad “Kutir Jyoti/ BPL” kiba pynbna ïa ka jingthang bording ba hapoh 5 Kilowatt, na ka bynta ki nongthang bording kiba la shah ot bording namar ka jingbym siew bai bording, khnang ban ïoh noh ïa ka bai thang bording ba dang sah.
Tang ki nongthang bording kiba la shah ot bording ki lah ban aplai ïa ka OTS scheme 2025.
