Shillong, Ïaïong 27
U Symbud Myntri Rangbah ka Jylla u Bah Prestone Tynsong uba khmih ruh ïa ka tnat Kam Pohïing u la ong ba ka Sorkar ka ïeng skhem ban pynthikna ba ki thaiñ khappud kin long kiba shngaiñ pura.
Haba kren halor ka kam thombor kaba la jia dang shen hapoh Pahalgam ha Jammu & Kashmir bad halor ka jingdonkam ban pyrkhing ban tehlakam ïa ka jingwan rung tuh ki briew shapoh ri, u Bah Prestone u la ong, “Ngi la dep shong jingïalang bad ki shipai Border Security Force (BSF) bad baroh ki bor kiba dei khmih, la ka dei ka kynhun jong ka jylla ne ka Sorkar Pdeng. Ngi don ha kajuh ka rukom pyrkhat bad ka rukom ïaid. Ngin pynthikna ba ïa ka thaiñ khappud bad kawei pat ka ri, ka dei ban long kaba shngaiñ pura ban ïakhun ïa baroh kitei ki jingeh ha kano kano ka dur ruh, ne kano kano ka jingwan rung tuh ha kano kano ka rukom, ngi la dep ban ïakren bad ngi la treikam pura ha kaba ïadei bad ki thaiñ khappud”.
Shuh shuh u Bah Prestone u la ong, “Ym tang katei, ngi la dep ïatreilang ryngkat bad ki bor shnong ne ki VDP kynthup ki BSF, pulit bad kiwei kiwei ki kynhun jong ka Sorkar Pdeng, kat kaba ngi lah, ngin pynthikna ba kam dei ban don kano kano ka jingwan rung tuh.”
U Symbud Myntri Rangbah u la kdew ruh halor ki khubor kiba la mih bad ong ba kila don ka jingkem ïa ki katto katne kiba la wan rung tuh, la pynngat bad la set ïa ki ha along katkum ki kyndon jong ka Foreigners’ Act.
Halor ka jingshah kem jong u samla na Umlyngka halor ka jingkynthoh ha ka rynsan social media da kaba ai jingkyrshan ïa ki lehnoh kiba la thombor ha Pahalgam, u Bah Prestone u la ong, “Ki pulit kila shimkhia mardor namar ba ngi sngewkhia bha ïa ka jingthoh jong une u khynnah kaba long pyrshah ïa ka ri (anti-national). Kan ktah ym tang ïa ka jylla Meghalaya hynrei kan ktah ruh ïa ka ri baroh kawei bad kan long ruh kum ka jingpynshlur ban leh ïa ki kam be-aiñ ka ban lam sha ka jingbuh jingma ïa ka shong suk shong saiñ jong ki nongshong shnong ka jylla bad ïa ki nongshong shnong ha ka ri baroh kawei. Kumta ngi la shimkhia ïa kane ka mat bad kumta la shim mardor ïa ki sienjam halor kane”.
Haba kyntu ïa ki nongshong shnong, u Bah Prestone u la ong, “Nga kyrpad ïa baroh ki nongshong shnong jong ka jylla bad ha ka ri baroh kawei, to ngin ïa ïeng tylli lang kawei bad ba ngin ym ailad ïa kino kino ki kam ïaleh pyrshah ïa ka ri ban jia biang ha kane ka ri baroh kawei.”
