Shillong, Ïaïong 27
Ka Shad Suk Mynsiem kaba dei ka Shad Niam Shad Rukom, ka ïeng ban pynkynmaw ïa ka jingïadei ba ïajan tam hapdeng ka Niam bad ka Kolshor.
Kane ka shad ka pyni ïa ka jingngeit ba tynrai bad ka jingai nguh ïa u Trai Nongbuh Nongthaw.
Kaba hakhmat duh jong ka jinglong Niam Khasi Tynrai ka long ban Kamai ïa ka Hok, Ban Tip Briew Tip Blei bad ban Tip Kur Tip Kha.
Ka Shad Suk Mynsiem ka dei ka Shad Ainguh ïa u Trai Nongthaw Nongbuh ban kyrpad kyrpon na u Blei ban thehsei ki jingkyrkhu kyrdoh.
Ki Nongshad kiba bat ba ksoh ha la Niam Khasi Tynrai, ki hiar sha ka lympung shad ban pyndep pura ïa ka bynta jong ki. Kumjuh, ki Thei Sotti ki ba long ki bynta ba kham kyrpang, kiba pyni ïa ka jinglong khuid long suba, ki kup ki phong ïa ka pansngiat kaba thew ïa ka jinglong sotti ka jong ki.
Katba ki Nongshad Shynrang pat, ryngkat ka wait, u symphiah ki shad katkum ka jingngeit u Khasi Hyndai ba un long kum u rangbah ban ker ban da ïa ka burom ka akor, ka ïing ka sem, ka it ka hima baroh salonsar.
Ki Duhalia ryngkat ki tiar put tiar tem jong ki, ki don ka bynta ba khraw ha ka jingpynurlong ïa kane ka Shad Niam, namarba ryngkat ki sur put sur tem ba ih jong ki, lah pat ban ïohi ïa ki Thei Sotti bad ki Rang Kynsai ba ki shad katkum ki sur tem. Ka Shad Suk Mynsiem ka sakhi kum ka dak ba khraw ba hiar pateng la pateng ha ki Khun Khasi Khara ba bat hok ïa ka Niam ka Rukom ba la buh bad bat da ki Tymmen Longshuwa.
Mynta ka sngi, ka Seng Khasi Laitkor Pyllun, ka tnad jong ka Seng Khasi Kmie ka la pynlong ïa ka Shad Suk Mynsiem kaba ar sngi kata ha ka 26 bad 27 tarik u bnai Ïaïong 2025 ha Madan Laitkor. Kane ka Shad ba la pynlong da ka Seng Khasi Laitkor, ka long ban ainguh ïa u Trai Kynrad Nongthaw Nongbuh ban thehsei ki jingkyrkhu ha ki khun ki ksiew ka Niam Khasi Tynrai.
Ka Seng Khasi Laitkor Pyllun ka la pynlong nyngkong eh ïa ka Shad Suk Mynsiem ha u snem 2007, bad dang shen ki dang dep ban rakhe ïa ka jingdap 50 snem jong ka jingsdang ïa ka Seng ha kane ka thaiñ. Kumta, katba dang ïaid ki sngi ki por, ki dang khmih lynti shuh-shuh ba ka seng kan nang-phuh nang-phieng bad nang roi nang ïar ha kane ka Bri u Hynñiewtrep Hynñiewskum.
Ha kane ka sngi, la sakhi ïa ka jingdon ryngkat lang ki Rangbah Seng ka Seng Khasi Laitkor, ki Tymmen ki San, ki Rangbah na ka Seng Khasi Kmie, nangta ki dkhot ka Seng Khihlang, u Pa’iem Habapan Sing Syiem, Syiem Khynnah ka Hima Khyrim, u MDC ka Nongkrem, Bah Kitborlang Syiem bad kiwei de ki kynrem ki lyndan.
