Pyongyang, Iaiong:
Ka North Korea ha kane ka kynti ka la pynpaw pyrthei ïa ka jhad thma ba thymmai ha kaba la iathuh ba kane ka jhad iapom ba mynta ka dei kaba la shna bad pyndait da ki tiar ba khlaiñ bor tam.
Kane ka jingpynbna ka long ruh tang hadien kumba shibnai ba u nongialam katei ka ri Kim Jong Un u la khmih lynti ban ioh pyrshang ïa ki drone ba thymmai kiba lah ban pynbthei ïalade lane ki ‘Suicide Drone’ bad ban wad bniah ia ka jinglong- jingman jong kitei ki tiar katkum ka jingstad AI jong kane ka juk, kaba la wanrah ruh ïa ka jingsngewkhia halor ka jingïatreilang bad ka jingiasnoh kti lang ka North Korea bad ka Russia.
Katei ka jhad thma kaba la ai kyrteng “Choe Hyon” na ka kyrteng jong u nongïaleh pyrshah Japan jong ka North Korea uba la khlad noh, ka dei ka jhad iapom kaba khlaiñ bor tam kaba don ia kumba 5,000 ton ka jingkhia bad kaba la shim por palat shi snem ban shna bad pynbit-pynbiang ia ka.
U Kim ha katei ka sngi u la ong ba ka kynhun shipai duriaw jong ka North Korea, mynta ka lah ban ai ia ka jingshakri kaba pura tam kum ka “jingshakri ba kongsan na ka bynta ban ai ia ka jingiada kaba khlaiñ ia ka ri.
