Shillong, Ïaïong 27
Ka North-Eastern Hill University Teachers’ Association (NEHUTA) ka la pynrem jur halor ka jingkynnoh thombor pyrshah ïa u Dr. Alok Singh, Assistant Professor ka tnad pule Hindi, NEHU, Shillong, ha ka janmiet Sngi Palei jong ka taïew ba la dep.
“La kynnoh ba u la shah thombor ha kamra jong u ha ki kynta long trei, kaba long kaba sngew kyndit haduh katta-katta bad ka NEHUTA ka dawa na ki bor pynïaid jong ka skulbah ban pynshitom pyrshah ïa kito kiba thombor ïa u Dr. Singh,” ong ki nongïalam ka NEHUTA ha ka kyrwoh khubor.
Ki la ong ruh ba ka seng ka sngewkhia shi kat dei bad pynpaw ka jingsngewsih namar katei ka jingjia – ym tang ïa u hynrei ïa ka kynhun nonghikai baroh kawei.
“Ha ka jaka pule ba shngaiñ jong ka NEHU, ka jingshah thombor jong uwei na ki dkhot ba donburom jong ngi ka phah ïa ka dak kaba bakla, bad ngi, kum ka seng ngi ïeng na bynta ka jingïapynbeit kaba suk ba saiñ khnang ba kum kane ka jingjia kan ym jia biang ha ka jaka pule ba kyntang jong ka jingpule ba halor bad jingwad bniah kaba ka NEHU ka ju bna nam,” ki la ong.
Ki la ong, ruh, “Ngi sngewkhia shibun ba katto-katne ki ‘actor’ kiba don ka jingïadei na jngai bad ka NEHU, kiba ïoh mynsiem na kum kane ka jingjia kaba sngewsih bad kiba pyrshang katba lah ban thaw ïa ka jingïashun ha ka jaka pule (da kaba don hajuh), shabar u pud u sam ka NEHU.”
Haba pynpaw ba ki nongshim bynta jong ka NEHU bad ki kynhun seng kin leh katba lah ban pynneh ïa ka jinglong kyntang jong ki ophis bad ki jaka pule na ki nongpynthut ba nabar kiba pyndonkam bakla ïa ka bor ban pyntlot ïa ka NEHU, ki nongïalam ka NEHUTA ki la ong, “Ngin kham sngewkhia lada kum kine ki ‘actor’ kiba pynthut ïa ka jinglong-jingman ki ïoh jingkyrshan lyngba kaba kum kane ka jingjia ba sngewsih jong ka jingshah thombor u Dr. Singh.”
Ki la ong ruh ba ha ka mynsiem bashisha jong ka synshar paidbah, ka NEHUTA ka ngeit ba ym don mano-mano ba lah ban pynduh ïa ki sur ka jingpyrshah bad ka hok lajong ban pyntreikam ïa ka jingsngew lajong ha ka skulbah, wat la ki long kiba khlaiñ bad kiba donbor katno-katno ruh.
“Kum ki nonghikai jong ka skulbah, ngin ïai pyrshah ïa ki jinglamler, ki jingpynwandur jong ka jingïaphiah bad jingïadei bad kano-kano ka kynhun ne seng, bad yn pyntreikam ïa ki nongrim jingpule ba ïar jong ka jinghikai bad jingwad bniah hapoh bad shabar ki kamra klas,” ki la ong.
Shuh shuh ki la bynrap ba haba ïadei bad katei ka bynta, ka NEHUTA ka kyntu ïa ki bor pynïaid ka skulbah ban sdang ïa ka jingtohkit halor kane bad ban shim ïa baroh ki lad ki lynti ba kyrkieh ban pyntikna ba u Dr. Singh un ïoh ïa ka hok bad ba kum kine ki jingjia kiba sngewsih kin ym jia biang ha ka skulbah.
“Kane ka jingjia ka dei kaba nyngkong eh ha ki phew snem bad kyrmen ba kan long kaba khatduh bad ka kynhun ki nonghikai NEHU baroh kawei ka hap ban ïatylli ban ïada ïa ka skulbah jong ngi,” ki la ong.
Ha kawei ka liang, ka Assam University Students’ Union (AUSU) bad ka Post Graduate Students’ Union (PGSU) jong ka Guahati University ki la pynrem jur halor ka jingshah thombor ba dang shen jong u Dr. Alok Singh, Assistant Professor ka tnad pule Hindi, NEHU, Shillong.
