Nongpoh, Ïaïong 27
Ka lympung ïalehkai phutbol kaba nyngkong eh jong ka seng Federation of Khasi Jaiñtia & Garo People (FKJGP), North Khasi Hills District kaba la pynlong kyrpang na ka bynta ban ai rynsan ïa ki para samla dkhot jong ka seng kiba dei na ki jylli bapher-bapher mynta ka sngi ka la poi noh sha kaba kut bad la wan ban pynhap pyrda da u Bah Dundee Cliff Khongsit, President ka FKJGP sengkmie.
Ha kane ka sngi, la wan ban sakhi ryngkat ruh da u Bah Kitboklang Nongphlang, Vice President ka sengkmie, u Bah Luistar Lyngdoh, President ka NKHD, u Bah Ricky Majaw, General Secretary ka NKHD, u Bah Lumlang Mawnai, Senior Vice President ka NKHD nalor kiwei de ki dkhot bad nongïalam shnong jong ka shnong Pahamsyiem.
Ïa kane ka lympung ïalehkai phutbol kaba la ai kyrteng kum ka 1st Inter-Circle Football Knockout Tournament, 2025, la pynlong ha ka madan ïalehkai jong ka NSCA ha Pahamsyiem bad ka jingïakhun phainal ha kane ka sngi ka dei hapdeng ka kynhun ïalehkai jong ka Umling Circle pyrshah ïa ka Umden Circle.
Haba phai khyndiat sha ka wat kaba nyngkong jong jingïakhun phainal ha kane ka sngi, ka kynhun ïalehkai jong ka Umling Circle ka ïoh ban thep nyngkong ar kol katba ka kynhun ïalehkai jong ka Umden Circle ruh kaba ka ïakhun tyngeh, ka la ïoh ban pynphai kylla tang shi kol bad ka jingïakhun ha ka kylla step ka kut noh da 2-1 kol.
Ha ka wat kaba ar jong ka jingïakhun, baroh ar ki kynhun, kata ka Umling Circle bad ka Umden Circle, wat lada ki la sei ïa la ki sap ki phong bad ïakhun shitom pynban kim shym la ïoh shuh ban thep kol. Kumta ka jingïakhun haduh kaba kut jong ka 90 minit ka la pynlong syndon ïa ka kynhun ïalehkai jong ka Umling Circle ban rah syndon ïa ka nam lahduh da kaba pynliem ïa ka Umden Circle da 2-1 kol.
Kum ka lahduh, ma Umling Circle ka la ïoh ban rah ïa ka khusnam song pisa kaba T.20 hajar ryngkat bad ka trophy, katba ka kynhun ïalehkai jong ka Umden Circle kaba la shah rem noh, kala ïoh ban rah ïa ka song pisa kaba T.10 hajar ryngkat bad ka trophy. Ha kane ka sngi, la sam ruh ïa ki khusnam shimet ba kynthup ïa ka nam Best Player of the Tournament ba la ïoh da u samla Pynsa Umsong na ka Byrnihat Circle bad ka nam Best Goalkeeper ba la ïoh da u samla Hehbok Rani na ka Umling Circle.
