Mawkyrwat, Ïaïong 27
Ka ‘erïong ryngkat u slap uba jur ha ka miet jong ka 26 tarik u Ïaïong, 2025 ka la rat naphang ïa ki ïing ki sem, ki dieng ki siej, ki jingthung jingtep bad ki nar ‘post’ ha South West Khasi Hills District. Ha kane ka jingjia, la antad kumba 30 tylli ki longïing kynthup ïa ki ïing syiar, ki dukan bad ka skul kiba hap hapoh ka Ranikor Civil Sub – Division ki la shah pynjulor.
Katkum ka tyllong khubor ba la ïoh lum, la ïathuh ba ki ïing kiba la kham julor ka dei ha ka shnong Kensohsan jong ka Kong Hostiful Thongni kaba la shah lied ka tnum ïing bad shah ban ruh ha u dieng bah bad ka ïing jong u Bah Benhavestar Lyngkhoi ha Domsohkhai ki bym long shuh ban shong briew.
Shuh shuh la ïoh jingtip ruh ba ha ka shnong Nongkdait, Nongnah, ki don kumba 10 tylli kiba la shah ktah bad shah pynjulor, ha Puksora ki don 10 tylli ki ïing ba la shah pynjulor, ha Kenïong ki don kumba 5 tylli bad kawei ka ïing skul bad ki don ar tylli ki ïing syiar bad kawei ka dukan ha ka shnong 25 Mer kiba la shah pynjulor kiba dei trai da u Bah Brabis Wahlang.
Shuh shuh ki tyllong khubor ki la ïathuh ruh ba ym tang ki ïing ki sem, hynrei wat ki mar rep bad ki jingthung jingtep ruh ki la shah ktah kum ki kwai bad ki dieng soh bad kumjuh bun tylli ki ‘post’ ilektrik (post light) ki la khyllem ha katei ka jingsyllad jong ka ‘erïong. Ha kawei ka liang pat la ïathuh ba ha kane ka jingjia kam shym la don satia kano-kano ka jingmynsaw ne jingjia ba sngewsih.
Ha katei ka jingjia ka la don ruh ka jingtwa jong ka khyndew ha ka surok Alukwareng bad ka jingpynkhuid ïa ka surok mynta ka la ïaid shakhmat.
