Jowai, Ïaïong 27
Ka Bamphalar ka dei kawei na ki rukom dustur ba la leh bad pyndep ha Jowai da ki katto katne tylli ki dong ki shnat shwa ban rep ban riang sha ki hali ki pynthor.
Kumta ha une u snem ka Loomkyrwiang Dorbar Shnong ha ka jingpynïaid ka Bamphalar Committee, ka dei kawei na ki dong ki shnat ban pyndep nyngkong ïa ka Bamphalar jong une u snem da kaba pynlong ïa ka jingïalehkai drama kaba ai kyrteng ‘Nasib da bynta’.
Ïa ka Bamphalar la pynlong ha Iungwalieh ha ka 25 tarik Ïaïong katba ha ka sngi ba bud la pynlong ka jingïabam doh sngewbha da baroh ki khun kumba la hikai u mynbarim.
U Waheh Shnong Ma Lammat-O Laloo haba pynïaid ïa ka jingïalang u la kynmaw tympang ïa ki ‘riew rangbah, ki longkmie longkpa kiba ju sngewtynnad ban ïashim bynta ha ki jingïalehkai drama bad ha kata ka por ka Loomkyrwiang ka dei kawei na ki dong ba bna nam kaba don ïa ki ‘riew donsap la ha ka thoh drama, thoh sur, ki nongrwai bad nongput nongtem.
Da ka jingsngewkhia ïa ka jinglong kyrpang jong kane ka rukom dustur, u Ma Lammat-O u la kyntu ïa ki khun samla ka shnong ban shimkhia ban bud pateng khnang ba kane ka rukom dustur kan neh kan sah pateng la pateng.
Ka Dorbar Shnong kum ka jingpynsah kynmaw ïa kane ka Bamphalar 2025, ka la pyllait paidbah ruh ïa ka riti treikam jong ka Dorbar Shnong kaba la dep pynjanai ïa ki aiñ ki kyndon da ki dkhot jong ka Constitution Committee bad ïa kane ka riti treikam la pyllait da u MDC ka Jowai North u Ma Awhai Andrew Shullai.
U Ma Andrew Shullai ha ka jingkren u la ïaroh ïa ka Dorbar Shnong Loomkyrwiang kaba la kitkhia ban pynneh pynsah ïa ki jinghikai u longshwa manshwa.
Ïa ka jingïalang la pynwai da ki kyntien khublei na u Ma Arkiru Laloo, Secretary Bamphalar katba u Ma Sophilos Lywait u la ai ka nguh ka dem.
