Shillong, Ïaïong 27
Watla ka um ha Umiam ka dang hiar tang kumba 16 phut tam haduh ka sngi ka 24 tarik Ïaïong 2025 hynrei ha kine ki sngi ka tnat MECL ka la sdang pynlip bording ha Shillong bad ha ki jaka nongkyndong.
Ka um ha Umiam ka la poi haduh 3194.30 phut haduh ka sngi Palei ka 24 tarik Ïaïong 2025.
Lada ïanujor ha ki snem ba la leit haba ka um ka la dap ha Umiam ka jaka ba thew ïa ka jingdon ka um ka poi beit haduh 3210 phut kaba pyni ba mynta u bnai haba ka bneng ka la sdang shit bad wanrah ka jingtyrkhong, ka um ka la hiar haduh 16 phut.
Da ka jinghiar ka um la ïohi ba ha ka pung Umiam la sdang ban paw ki maw bad katto katne ki kynroh ha lynter jong ka Umiam.
Kumban shu pynkynmaw ha ki snem ba la leit ka jingduna ka um ha Umiam ka dei ha ki bnai Jymmang namar ba duna slap bad ka ju kiew biang ynda la poi ha taïew khatduh u bnai Jylliew ynda la jur ka jinghap slap ha Shillong.
Kane ka jinglip bording kam shym la don ka jingpynbna paidbah ne pynbeit ryntih da ka tnat MeECL hynrei ka jinglip bording ka don ba shi kynta don ki por ba shiteng kynta man ka sngi kaba la pynthut ïa ka jingtreikam lada dei ha ki ophis Sorkar, ophis riew shimet ne kiba pyndonkam bording ha ki ïing briew.
