Agartala, ïaïong:
Ha Tripura ki la don san ngut ki briew kiba la shahkem ha ka miet jong ka sngi Thohdieng halor ka jingkynnoh ba ki pynsuk bad ïarap ïa ka jingwan rung beaiñ jong ki nong Bangladesh sha India.
Ïa kine ki briew la kem ha ka jingkhynra lang jong ki pulit ka Government Railway Police (GRP), ka 81 Battalion jong ki shipai Border Security Force (BSF), bad ki kynhun na Sonamura bad Jatrapur Police Station.
Kine kiba la shah kynnoh ki dei kiba la tip kyrteng kum u Jalil Miah bad u Md Hassan na Dhanpur (Sonamura), ha ryngkat u Manir Hossain, u Jashim Uddin, bad u Alamgir Hossain na Jatrapur kaba hap ha Sepahijala distrik, ong u OC GRP Agartala, u Tapas Das.
Ki pulit ki la ong ba kane ka jingpyntreikam ka long hadien ka jinglum jingtip ba la lum na ki nong Bangladesh kiba dang shu shah kem dang shen ha kylleng ka Tripura.
Ki jingtohkit ba nyngkong ki pynpaw ba ki briew kiba la shah kem ki dei shi bynta jong ka kynhun kaba kham heh kaba ai jaka sah, bam, bad leit jingleit sha ki nongwan rung tuh, kaba ïarap ïa ki ban poi sha ka jaka sangeh rel ha Agartala na ka bynta ban leit jingleit.
Ha ka jingtohkit ba nyngkong, ki briew kiba la shah kem ki la pynpaw ïa ki kyrteng jong ki katto katne ngut kiwei pat ki briew kiba la suba ba ki donkti ha ka kam khaïi briew. Ki bor pynïaid ki la pynthikna ba ka jingtohkit ka dang ïaid shakhmat, ha kaba la khmih lynti ba kin dang don shuh shuh ki jingkem.
