Tura, Ïaïong 28
Haduh ar tylli ki kali ki la julor na ka jingshah ban ha uwei u dieng bah uba la khyllem jraiñ hapdeng surok na ka jingjur jong ka lyer ryngkat u slap ba jur kaba la jia ha ka step phyrngab jong ka Lah Sngi U Blei.
Kane ka jingjia jong ka jinglynshop ka lyer ryngkat u slap ba jur ka la jia ha sor Tura bad ruh ha ki jaka ba marjan. Ka jingjia khyllem u dieng bad julor ki kali ka dei ha ka thaiñ Upper Babupara kaba don mar pyrshah bad ka Cenotaph site.
Katkum ka khubor la ong ba u slap ba jur u la sdang ha ka por kumba 1.30 shiteng synñia bad ïai bteng haduh ka por 6 baje mynstep.
Ki ar tylli ki kali kiba la shah pynjulor ki long ka Maruti 800 kaba la kham julor bun bad ka Hyundai Eon. Une u dieng bah uba la khyllem u la pynjulor ruh ïa ki sainar ding ilektrik.
Halor ka jinglong jingman jong ka mariang kaba la jia ha kane ka sngi, ka tnat Indian Meteorological Department (IMD) Meghalaya ka la pynmih ïa ka jingmaham ban ther u ‘lapbah ha kylleng ki district jong ka jylla. Ka IMD, ka ïathuh ba kan don ka jinghap slap ha baroh ka Jylla Meghalaya, ha ki saw ne san sngi ban wan, ha ryngkat u pyrthat bad ka ‘leilieh kumjuh ka lyer kaba jur.
Ka IMD ka la maham ruh ïa ka jingkhynñiuh jumai kaba lah ban jia ha ka 29 tarik u Ïaïong, kaba lah ban ktah shuh shuh ïa ka jingim kaba man ka sngi ha kylleng ka jylla.
Halor kane, ka IMD ka la bthah ïa ki paidbah nongshong shnong ba kin long kiba husiar namar ba kan don ka jinglynshop ka lyer kaba jur bad kumjuh u pyrthat.
Na ka liang ki bor pynïaid District ki la kyntu ïa ki paidbah ba kin long phikir bad husiar bha bad ruh ban wad jingtip halor ka jinglong jingman jong ka suiñ bneng.
