Jowai, Ïaïong 28
Ka Jaiñtia Students Union (JSU) ha ka Lah Sngi U Blei ka la dawa na ka tnat pulit ka Jylla ba kan shim ïa ki sienjam kiba pyrkhing khnang ban lah khanglad ïa ka jingwan rung tuh jong ki briew na Bangladesh.
Ha ka shithi sha u Superintendents of Police (SP) ka West bad East Jaiñtia Hills District, ka JSU ka la pynpaw ïa ka jingsngewkhia kaba jur halor ka jingnangkiew jong ki nongwan buhai shnong beaiñ na Bangladesh kiba la wan rung tuh sha India lyngba ki jaka khappud jong ka Rilum Jaiñtia.
“Kine ki nongwan rung tuh la ïohi ba ki la jia da ka jingïarap jong ki agent ne dalal kiba dei ki trai shnong, kaba wanrah ka jingsngewkhia kaba jur halor ka jinglong jingman ha ki thaiñ khappud ki jong ngi,” la ong ka shithi.
“Halor kine, ngi kyrpad jur ïa ka tnat pulit ba kan shim mardor ïa ki sienjam ban tehlakam ïa kine ki kam beaiñ da kaba pynkhlaiñ ïa ki khyrdop talasi ryngkat ka jingpynbun ïa ki bor pahara da kaba pynjur ïa ka jingtalasi ïa baroh ki kali khamtam ïa ki kali jong ki nongwan jngohkai lem bad kiwei kiwei ki kali kiba don jingsuba ïa kiba ju pyndonkam ha kaba kit ïa ki nongwan rung beaiñ shapoh ka jylla,” bynrap ka seng ha ka shithi.
Nalor kata, ka JSU ka kyntu ruh ïa ka tnat pulit ban pynkhlaiñ ïa ka jingïatreilang bad ki bor shipai Border Security Force (BSF) na ka bynta ban peitngor bad pynjur ïa ka jingpahara ha ki jaka khappud.
“Ngi kyrmen ba ka tnat pulit kan shimkhia halor kane ka mat bad ban shim mardor ïa ki sienjam ban ïada bad pynneh ïa ka jingshngaiñ, ka jinglong kyrpang bad na ka bynta ka bha ka miat jong ki trai shnong ka thaiñ,” ka la bynrap.
