Jowai, Ïaïong 28
U District Sports Officer (DSO), West Jaiñtia Hills District u la pynbna ba ha ka taïew kaba nyngkong jong u Jylliew un sdang noh ïa ka lympung ïalehkai Dist-rict Level Inter School Subroto Mukherjee Cup Football Tournament 2025 ha madan Kiang Nangbah Stadium, Jowai.
Kane ka lympung kan dei na ka bynta ki khynnah skul kiba hapoh 15 snem jong ki shynrang, katba hapoh 17 snem jong ki kynthei bad shynrang. Ïa ki form lah ban ïoh na ka shlem treikam u DSO ha ka por ba long trei.
Kino kino ki skul kiba kwah ban ïashim bynta kin hap ban pynpoi ïa ki kyrteng jong ki khynnah ryngkat ki kot donkam kum ka Passport Size Photographs, Aadhaar Card, syrnot sngi kha ba la ïoh na ka Municipal Board/CHC/PHC ha shwa ka 9 tarik Jymmang lait nangta yn ym pdiang shuh ïa kiba pynpoi hadien jong katei ka tarik.
Ka jingïalang jong baroh ki skul kiba ïashim bynta kan long ha ka 9 tarik u Jymmang ha ka por 1 baje nohphai sngi ha Kiang Nangbah Indoor Stadium, Jowai. 20 ngut ki nongïalehkai na ka bynta kawei pa kawei ka kyrdan kin shah peit bniah (screening). Ki kot pynshisha kum ka Original Birth Certificate bad Aadhaar dei ban rah da ki nongïalehkai ha ka sngi screening. Ka Aadhaar card bad syrnot sngikha ka long kaba donkam, yn nym shah ïa ki nongïalehkai ban screening khlem ka Original Aadhaar bad Birth Certificate.
Ka jingot snem na ka bynta ka Under-15 (Boys) kin dei kiba kha shwa lane hadien ka 1 tarik u Kyllalyngkot 2011. Ha ka Under-17 (Boys) kin dei kiba kha shwa lane hadien ka 1 tarik u Kyllalyngkot 2009 bad Under-17 (Girls) kin dei kiba kha shwa lane hadien ka 1 tarik u Kyllalyngkot, 2009. Ïa ki jingtip kiba kham bniah ki lah ban phone ha ki number 9612942208.
