Ottawa, Iaiong:
U nongshah kynnoh ha ka jingjia thombor ka kali ha Canada kaba la shim ia ka jingim jong 11 ngut ha kawei ka jingkhawai ha surok jong ki nong Philippines, la pynngat ia u ha ka kyndon pyniap briew, la iathuh ki pulit ha ka Sngi U Blei. Ki pulit ki la iathuh ba ki la pynngat kyndon pyniap briew ia u suba don kti ha ka jingtynrah kali ha Canada kaba la shim ia ka jingim jong 11 ngut ki briew kiba dang ialeh kmen ha ka jingkhawai ha surok jong ki nong Philippines bad ki pulit ki dang wad bniah ruh ia katei ka jingjia ha katei ka sngi khnang ioh ban pynngat shuh shuh ia utei u runar ha ki kyndon pynkheiñ aiñ kiba iadei bad ka jingpynkheiñ aiñ jong u.
U Lo, uba la wan mih ha iingbishar shwa ban leit phai biang sha ka jingshah kem jong ki pulit, la kynnoh ba u la leh da kaba thmu bad u don ia ka jingshitom ktah khlieh.
Wat la katta, ym shym la lah ban pyntikna ia ka daw jong katei ka jingshah thombor ha katei ka janmiet jong ka Sngi Saitjaiñ ha ka nongbah Vancouver kaba don sha ka phang Shathie jong katei ka ri wat lada ki pulit ki la pyntip ba katei ka jingjia kam don jing-iadei eiei bad ki lehnoh lane bad ka jingthmu thombor jong ki lehnoh.
U heh pulit katei ka thaiñ, u Steve Rai, u la ong ba utei u briew uba la 30 snem ka rta u ñiah ia ka kali Audi SUV kaba lieh bad u la don dak teng bad ki pulit hynrei ka jing-iakren bad u kam long kaba shai namar don ki heh ka koit- ka khiah kiba pynpaw ba utei u briew u dei uba duna ha ka bor pyrkhat.
Ki paidbah nong Philippines ki la ia lum lang ha katei ka jaka leh kmen ha Vancouver ha ka por ba ki nongleit sha katei ka tamasa, ki la shah rat dusmon ha katei ka kali SUV.
Kane ka jingrakhe kaba la khot ka Lapu Lapu Festival ka dei ka jingkynmaw burom ïa uwei u nongïalam jong ka ri Philippines uba pyrshah ïa ka jingsynshar phareng naduh ki 1,600 snem mynshwa.
U Myntri Rangbahduh ka ri, u Mark Carney, ha ka jingkren lyngkot sha ka jaitbynriew, u la jaw ummat haba kren halor katei ka jingjia ba sngewsih.
Katkum ki dur ba la saphriang paidbah ha ki rynsan ‘Social Media’, kiba la pynshisha da ka lad pathai khubor AFP, la iohi ba pyni ia ka kali kaba don ka durkhmat kaba la sniew kaba la ieng harud katei ka surok, ha kaba la iohi pat ia ki kynhun iarap bad ka kynhun ki nongsumar kiba dang leit ban peit-thuh bad iarap ia kitei ki paidbah kiba don ha katei ka jaka bad kiba la ngat ha katei ka jingjia ba sniewbok.
