Shillong, Ïaïong 28
Ka President ka India, ka Droupadi Murmu ha ka Lah Sngi U Blei ka la sam 4 tylli ki khusnam ‘Padma Vibhushan’, 10 tylli ki ‘Padma Bhushan’ bad 57 tylli ki ‘Padma Shri’ na ka bynta u snem 2025 ha ka jingïalang ‘Civil Investiture Ceremony-I’ kaba la long ha Ganatantra Mandap jong ka Rashtrapati Bhawan.
Ka President ha kane ka jingïalang ka la pynkup burom ruh ïa u Prof. David R. Syiemlieh na Meghalaya da ka khusnam ‘Padma Shri’ na ka bynta u synñiang sha ka thoh ka tar bad pule-puthi.
Ha kane ka sngi la don lang u Vice-President ka Ri, u Jagdeep Dhankhar, u Myntri Rangbahduh ka ri, u Narendra Modi, u Myntri kam pohïing ka Sorkar Pdeng, u Amit Shah, ki Myntri Sorkar Pdeng bad ki kynrem ki lyndan.
Ki nongïoh khusnam ‘Padma’ kin leit ban ai burom ha ka ‘National War Memorial’ ha ka 29 tarik Ïaïong, 2025.
Ha kajuh ka por, kin leit jngoh ruh ïa ka Rashtrapati Bhawan bad ka Pradhanmantri Sangrahalaya.
U Prof. David R. Syiemlieh u dei u ‘riewshemphang ha ka histori bad ka deiriti jong ka Thaiñ Shatei Lam Mihngi bad u Chairman barim jong ka UPSC.
La kha ïa u ha ka 22 tarik Kyllalyngkot, 1953 ha Mutrapore, Sibsagar, Assam, bad u la pyndep ïa ka ‘Graduate’ bad ‘Honours’ ha ka ‘History’ ha u snem 1974 na St. Edmund’s College, Shillong.
Hadien kane, u la pyndep ïa ka ‘M. Phil’ ha u snem 1980 bad Ph.D ha u snem 1985 na North-Eastern Hill University.
Hadien nangne, u la hikai ha St. Edmund’s College (1977-1979) bad NEHU (1979-2012) ha kaba u la bat ïa ki kam bapher-bapher kynthup ïa ka Dean Students’ Welfare; u heh duh jong ka tnad pule History; u nongpynïaid ïa ki eksamin; u la bat ruh ïa ka kam kum u Registrar bad ïa ka kyrdan kum Pro- Vice-Chancellor.
U la shah thung kum u Vice-Chancellor jong ka Rajiv Gandhi University, Arunachal Pradesh ha u Risaw 2011 bad ïasoh kum u dkhot jong ka Union Public Service Commission ha u snem 2012 bad ha u snem 2017 u la shah thung kum u Chairman ka UPSC.
Ka kot banyngkong eh jong u Prof. Syiemlieh, ‘British Administration in Meghalaya: Policy and Pattern’, Heritage Publishers, New Delhi, 1989, ka la pynskhem ïa u kum u ‘riewstad uba la pynshong nongrim ha ka histori bad ka kolshor jong ka Jylla Meghalaya bad ka Thaiñ Shatei Lam Mihngi.
Hadien kane la bud sa ka ‘Survey of Research in History on North East India 1970-1990’ bad ka kot ba la pynbeit ryntih bad u J. B. Bhattacharjee, ‘Early States in North East India’.
Ki kot kiba u la pynmih dang shen ki long, ‘On the Edge of Empire: Four British Plans for North East India bad Layers of History: Essays’ shaphang ki Khasi-Jaiñtia, ka jinglumlang ïa ki 17 tylli ki jingthoh shaphang ka histori bad ka kolshor jong ki Khasi-Jaiñtia jong ka Meghalaya.
U la pynïaid ïa ka jingwad bniah, jingpynbeit bad jingpynmih ïa ka ‘Meghalaya at Fifty 1972-2022’, kaba la pyllait paidbah ha ka 21 tarik u Kyllalyngkot 2022 ha ka jingdap sanphew snem jong ka jingseng ïa ka Jylla Meghalaya.
U la wad bniah bad lap ïa ka tarik jong ka jingïap bad kiwei-kiwei ki jingtip ba bniah shaphang ki sngi ba khatduh jong u Tirot Sing, u Syiem jong ka Hima Nongkhlaw ha ki lum Khasi, Meghalaya, uba la shim ïa ka bynta ba hakhmat eh ha ka ban pyrshah ïa ka jingrung jong ki Phareng sha ki lum Khasi bad u la ïap katba u dang don hapoh ka jingshah set byndi ha ka 17 tarik u Naitung, 1835.
Shuh shuh u Prof. Syiemlieh u la ïoh shibun ki ‘Scholarship’/’Fellowship’ kiba kynthup ïa ka ‘Scholarship Post Graduate’ jong ka Sorkar India; ‘Senior Fulbright Fellowship’ na ka bynta ka jingwad bniah ha USA; ‘Charles Wallace Grant’ na ka bynta ka jingwad bniah ha UK bad ‘Indo-France Cultural Exchange Grant’ na ka bynta ka jingwad bniah ha Paris.
U la shah jied kum u President, NEIHA ha u snem 2010-2011 bad u la long u dkhot (ar-samoi) jong Indian Council of Historical Research, New Delhi.
U la long u dkhot Council jong ka Indian Council of Social Science Research, New Delhi na bynta shi samoi bad shah jied kum u President jong ka Modern India Section, Indian History Congress ha ka dorbar kaba 73 jong ka Bombay University ha u Kyllalyngkot, 2013.
Nalor kane, u la don ha ka Academic Council bad ka ‘Board of Management’ jong katto-katne ki skulbah. Ha ka jingkyrshan ba bteng jong u ïa ka pule-puthi bad ka thoh ka tar, u la long kum Adviser ka Meghalaya State Education Commission, ka Sorkar Meghalaya.
