Shillong, Ïaïong 28
U rangïalehkai kriket barim ka ri India, Ravichandran Ashwin u la shah pynkup burom da ka khusnam Padma Shri ha ka President ka ri ka Droupadi Murmu ha ka Lah Sngi U Blei ha Rashtrapati Bhavan.
Ka BCCI ka la pynmih ïa ka durkhih jong u Ashwin ba u ïoh ïa katei ka burom ha ka rynsan social media jong ka X. Ka Padma Shri ka dei ka khusnam kaba saw na kiba heh tam hapoh ka ri, hadien ka Bharat Ratna, Padma Vibhushan, bad Padma Bhushan.
La ithuh ïa u kum uwei napdeng ki nongkawang bol (spin) ba tbit tam jong ka India, u Ashwin u la shah pynkup ïa katei ka burom lyngba ka jingnoh synñiang jong u ha ka jingïalehkai kriket.
U Ashwin u la don ka bynta kaba kongsan ha ka jingjop jong ka India ha ka ODI World Cup 2011 bad ha ka Champions Trophy 2013.
Ha ka jingïalehkai Test, u Ashwin u la shim 537 wiket na 106 tylli ki jingïalehkai bad pynlong ban long u nongïalehkai ba ar ba bun tam ki wiket ha India ha ka rukom ïalehkai. U la lah ruh ban tied 3,503 ron, kynthup ïa hynriew tylli ki ‘century’, kaba pyni ïa ka jingtbit jong u kum rangïalehkai all-rounder.
U la shongthait noh na ka jingïalehkai kriket bar ri mynshem snem hadien ka jingïalehkai Boxing Day Test ka India pyrshah ïa ka Australia ha Melbourne.
