Shillong, Ïaïong 28
Ka Holy See Press Office ha ka Lah Sngi U Blei ka la pynbna ba ka jingïalang ban jied ïa u Pope bathymmai kan sdang ha ka 7 tarik Jymmang.
“Ki Cardinal kiba don ha Rome ki la shim ïa kane ka rai ha ka Lah Sngi U Blei ha ka ‘General Congregation’ kaba san jong ki. Ka jingïalang kan long ha Sistine Chapel, Vatican kaba dang khang ïa ki nongwan jngohkai ha kito ki sngi,” la thoh ka Vatican ha ka rynsan lad pathai ‘X’.
Ka jingpynbna ïa kane ka la long kaba hakhmat eh ha ka ‘agenda’ jong ki Cardinal kiba la pynlong ïa ki jingïalang ban rai ïa ki kam jong ka Balang Katholik hadien ka jingkhlad noh jong u Pope Francis ha ka 21 tarik u Ïaïong. La pynjlan ïa ka jingpynbna ïa ka tarik haduh ka jingleit ontep ïa u ha ka Sngi Saitjaiñ. Ka College of Cardinal, ka kynhun kaba kham rit kaba don ïa 135 ngut ka lah ban jied ïa u Pope bathymmai. Ka Vatican ka la ong ba palat 180 ngut ki Cardinal ki la ïashim bynta ha ka jingïalang kaba san kaba la long ha Rome ha ka Lah Sngi U Blei.
