Shillong, Ïaïong 28
Ka Meghalaya Pradesh Mahila Congress (MPMC) ka la pynpaw ïa ka jingsngewsih bad ka jingpyrshah jur halor ka jingpynbna khang dukan da ka ‘Barabazar Merchants and Traders’ ha ka Lah Sngi U Blei.
“Kane ka rai ban khang dukan, katkum ka MPMC, ka ktah jur ïa ki paidbah kiba la mad shibun ka jingshem jingeh ha ka imlang-sahlang bad ha ka jingïoh jingïarap,” ong ka President ka MPMC, Kong Joplyn Shylla ha ka kyrwoh khubor.
Ka Kong Shylla ka ong ba ha kum kane ka por ba ki paidbah ki dang shem jingeh ha ka liang ka ïoh ka kot bad ka jingkiew dor ki marbam-mardih, ka jingïaid beit ki kam dukan bad ki jingshakri ka long kaba donkam tam.
Ka la ong ruh ba kane ka pyrshah ïa ka rukom pynlong khang dukan khlem da ïaid lyngba ka jingryntih kaba biang lane ka jingïamir jingmut bad ki paidbah.
“Ka MPMC ka kyntu ïa ki nongpynïaid bad ki bor synshar ba kin shimkhia bad pynbeit noh mardor ïa kane ka jingeh da kaba buh hakhmat ïa ka bha ka miat jong ki paidbah,” ong kane ka nongïalam.
Ha kawei pat ka liang, haba pynphai ktien halor kane ka bynta, ka Mahila Morcha BJP, Meghalaya Pradesh ka la ong ba ka Congress kam don ka jingkitkhlieh na bynta ka ri.
“Ha ka por ba ka ri ka dang don hapdeng ka jingsngewsih namar ka jingshah pynïap ba shyrkhei jong ki briew ba lui-lui ha Pahalgam, haba ka pyrthei ka la kyndit halor ka kam ba shyrkhei jong ki lehnoh ha Kashmir, hangne ka wan ka Congress ha ryngkat ka jinglong pyrshah ri jong ka sa shisien pat,” ong ka President ka seng, Kong Susuki Pariat ha ka kyrwoh.
Ka la ong ruh ba ka jingkhang ïa ki kam khaïi ha Greater Shillong ka dei da ka mon sngewbha lajong – ka dak ban pynpaw ïa ka jingïatylli bad ki longïing kiba la mad ïa ka jingsngewsih, kiba la duh noh ïa ki baieid bathoiñ ha ka jingshah thombor ha ki lehnoh.
“Hynrei ka Congress ka jngai haduh katta-katta na ka jingsngew jong ka ri bad kam don jingeh eiei ban pyrshah ïa ka kam kaba pynpaw ïa ka jingsngewsih lang jong ka India. Ha kawei ka liang kaba pynshisha ïa ka jinglong pyrshah paidbah jong ka seng,” ka la ong. Shuh shuh ka la bynrap, “Kum ki kynthei, ngi don jingsngew halor ka jingsngewsih jong ki para kynthei jong ngi kiba ki kurim jong ki, ki la shah siat hakhmat jong ki ha Pahalgam. Kum ka ri ngi la kyndit ïa kaba kum kane ka kam kaba ishyrkhei; hynrei ka Congress ka pyrshah halor ka jingpynpaw ïa ka jingsngewsih da ki trai nongkhaïi ka Shillong lyngba ka jingkhang kaba long da ka mon lajong bad ka bym shym la pynbor.”
“Ka jinglong pyrshah paidbah bad pyrshah ri i kumba ka la rung tynrai ha ka DNA jong ka Vadra-Gandhi Congress,” ka la ong.
