New Delhi, Ïaïong 28 (UNI)
Ka Sorkar Pdeng ka la khang ïa 16 tylli ki ‘YouTube Channel’ jong ka Pakistan namar ka jingpynsaphriang ïa ki jingthoh kiba pynkhih-win, kiba lamler bad kiba ïalam bakla pyrshah ïa ka India, ïathuh ki tyllong khubor ka Sorkar ha ka Lah Sngi U Blei.
Kane ka rai ban khang ïa ki ‘Channel’ ka Pakistan la shim hadien ka jingai jingmut jong ka tnad Pohïing ka Sorkar Pdeng (???).
Kine ki ‘Channel’ ka Pakistan ki pynsaphriang ïa ki jingthoh kiba pynkhih-win bad kiba ktah namar ka jingsngew jaidbynriew, ki jingbatai kiba lamler bad kiba ïalam bakla lem bad ki jingtip kiba bakla pyrshah ïa ka India, ki shipai bad ki tnad pahara jong ka hadien ka jingjia ba sngewsih ha Pahalgam, Jammu & Kashmir, ong ki tyllong khubor.
Kine ki ‘YouTube Channel’ kiba la shah khang ki kynthup ïa ka ‘Dawn News’, ‘Irshad Bhatti’, ‘SAMAA TV’, ‘ARY NEWS’, ‘BOL NEWS’, ‘Raftar’, ‘The Pakistan Reference’, ‘Geo News’, ‘Samaa Sports’, ‘GNN’, ‘Uzair Cricket’,’Umar Cheema Exclusive’, ‘Asma Shirazi’, ‘Muneeb Farooq’, ‘SUNO News HD’ bad ‘Razi Naama’.
Ha kawei ka liang, ka Sorkar Pdeng ka la pyrshah jur haba ïadei bad ka jingai khubor ka BBC halor ka jingshah thombor ba dang shen ha Pahalgam.
Ha ka kyrwoh ba la phah sha ka khlieh ka BBC India, Jackie Martin, ka Sorkar ka la pynpaw ka jingsngewkhia halor ka jingpyndonkam jong kane ka lad pathai khubor ïa ka kyntien ‘Militants’ ha ka jaka jong ‘Terrorists’ ha ka khubor jong ki.
Ki tyllong khubor ka Sorkar ki ong ruh ba kin ïai peitngor ïa ki khubor jong ka BBC.
Kum ban shu kdew hangne, 26 ngut ki nongjngohkai pyrthei ki la shah pynïap ha ka jingshah thombor ha ki lehnoh ha Pahalgam, Jammu & Kashmir ha ka 22 tarik Ïaïong.
