Shillong, Ïaïong 28
Ki nongkhaïi ryngkat ki nongshong ïew ha Ïewduh kaba dei kawei na ki ïew kaba hehduh ha ka Jylla ka la kynjah slam slam namar ka jingkhang kdam ïa la ki dukan kum ka dak ban pyni ïa ka jingïatylli bad ka jingsngewlem halor ka jingthombor jong ki lehnoh ha Pahalgam, Jammu & Kashmir, kaba la shim ïa ki 28 tylli ki mynsiem briew.
Ha kane ka sngi, la ïoh ban sakhi ruh ba baroh ki dukan khamtam ki dukan jong ki nong-khaïi bar jylla ki la khang khyrdep lut ha ka thaiñ Khyndailad (Police Bazaar) bad kumjuh ha Ïewduh lait noh tang katto-katne ki dukan Khasi kiba plie.
Kane ka jingkhang kdam ïa la ki dukan da ki nongkhaïi ka dei ka dak jong ka jingïasnohkti lang bad ka jingkyrpad jong ka Shillong Citizen’s Forum (SCF) lem bad ka Barabazar Merchants and Traders ban ïakhang dukan ha kane ka sngi kum ka dak ban pynrem jur ïa ki kam thombor jong ki lehnoh bad ban sngewlem halor ka jingduh noh jong 28 tylli ki mynsiem briew.
Ha ki thaiñ Khyndailad, Ïewduh, Garikhana, Jhalupara, Polo bad kiwei kiwei ki jaka ruh, ka jingkhang ïa ki dukan ka la trei kam ryntih da ki nongkhaïi.
Lah ban kdew ba ïa kane ka jingkhang jong ki dukan la pyrshah jur da ka HITO kaba la mudui sha ki bor pynïaid District bad kumjuh ka Mahila Congress.
Ki nongkhaïi ki la kheiñ ïa ka jinghiar thma ïa ki lui-lui ha Pahalgam kum ka kam khawpud bad dawa ïa ka Sorkar ban leh da kaba tyngeh pyrshah ïa ki kynhun lehnoh bad kiba don bynta sha lyndet namar kane ka kam pyntriem ba shyrkhei.
