Na ka por sha ka por, ki pulit ka jylla ki ju pynbna ba ki la ïoh ban kurup ïa ki jingdih pynbuaid kiba ktah shi kat dei ïa ka koit ka khiah, ka jingmut jingpyrkhat, ka kamai ka kajih bad ka shongsuk-shongsaiñ. Kine ki jingdih pynbuaid ki dei kita kiba ngi tip kum ki drok. Ha kane ka jylla, ngi la ïohi ba ki pulit ki ju pyntip ba ki kham ïoh bha ban kurup ïa ki drok kum u “Heroin” bad ki dawai kuli ba la tip kum u “YABA” lane “World is Yours” lane ki “Meth”.
Ka jingdih bad jingdie ïa ki drok ka long kaba ma haduh katta-katta naba ka wanrah ïa kiba bun ki jingma ha ka imlang ka sahlang bad ka jaidbynriew. Ngi ïohi ba ki don bun ki khun samla ki jong ngi kiba dang 14 snem ne duna ïa kata kiba la ngop ha ka jingdih drok bad katno ka ktah ïa ki, ka longïing-longsem bad ka shnong ka thaw. Tang shu la ngat ha ka shrip jong u drok, bun ki khynnah bad ki samla kim banse ban iehnoh wat ïa ki jingpule ki jong ki namar u drok u pynsyrtok haduh katta-katta.
Ka jingpynsyrtok jong u drok ka pynlong ruh ïa kito kiba pyndonkam ban thom ïa ka sang da kaba tuh na la ïing ne na kiwei pat tang ban ïoh thied ïa ki drok. Shisien ba la ngop ha u drok, la phyrngop, bad shisien ba la phyrngop, la syrtok. Ym dei ba syrtok tang uta uba dih ne pyndonkam drok, hynrei wat ka longïing longsem ruh ka mad ïa kiba bun ki jingeh. Nalorkata, ka longïing ka hap ban kitkhlieh ban sumar ïa ki khun ne ki hynmen ki para kiba la ngat ha kane ka apot dih drok. Ka jingsumar kam dei kaba kai, bad ka shim por da ki snem haduh ba uto uba shah sumar un ïoh biang ïa ka met kaba koit kaba khiah, ka pyrkhat ka pyrdaiñ kaba beit bad ka jingsuk bad jingtngen ha ka mynsiem.
Ha kaba ïadei bad ka jingkhaïi ïa ki drok, bunsien ngi ïohi ba dei tang ki nongñiah kali, ki nongbud bad kiwei ki rit ki ria kiba kham shah kem. Ym pat ju kham lap koit ba kita ki heh kiba donkti ban pynïaid ïa ki drok na kawei ka jylla sha kawei pat lane na kawei ka Ri sha kawei pat ba kin ngat ha ka shrip jong ka aiñ. Kam myntoi ban shu kem tang ïa ki rit ki ria namar kan nym lah ban pynkut ïa ka jingkhaïi drok. Dei ruh ban wad shitom ïa ki khlieh ne hehduh kiba don sha lyndet bad ki bym ju kham paw. Ki pulit ym tang jong ka jylla, hynrei ka Ri baroh kawei ki dei ban kham trei shitom ban ïoh bat ïa kita ki heh ki haiñ kiba donkti ban pynngop ïa ki khun ki kti, ki para ki pyrsa ha ka kam dih drok.
Halor ka jingai jingsumar ïa ki nongdih drok, ka Sorkar Jylla kam dei shuh ban pynslem ban shna ïa ki jaka sumar namar kumba ka long mynta, ka Meghalaya kam don wat tang kawei ruh ka jaka jong ka Sorkar kaba lah ban sumar sukher ïa ki nongdih drok. Baroh ki nongdih drok kiba wad dawai pynkhiah kin hap ban shaniah beit ha ki jaka sumar jong ki ‘riew shimet. Kito kiba kham don ka spah, ki ju phah sumar ïa la ki khun ne ki bahaïing jong ki shabar jong ka jylla. Hynrei ym baroh kiba kot bor ban phah ïa ki khun ki kti sha ki jaka sumar ki ‘riew shimet ne shabar jylla na ka bynta ban ïoh ïa ka jingsumar.
Ha ka liang ki shnong ki thaw, ngi ïohi ba ha kane ka nongbah Shillong, jan baroh ki shnong bad ki dong ki mad jingeh namar ka jingdon jong ki nongdih bad nongdie drok. Ka long shisha kaba pynktha khlieh ïa ki Rangbah Shnong bad kiwei ki nongkitkam shnong ban teh lakam ïa ka jingsaphriang jong ka jingdon ki nongdih bad ki nongdie ïa ki drok ha ki shnong bad ki dong. Tangba kum ki nongïalam shnong kiba don jingkitkhlieh ki dei ban peit ba kan ym don ka jingshah tied shah bom khamtam jong ki nongdih drok namar ka jingdih drok ka dei ka jingpang kaba hap ban ïoh ka jingsumar kaba biang. Lada da kaba tied bad bom shnong ka lah ban pynjem ïa kane ka jingpang, ngin ym donkam ban dawa na ka Sorkar ba kan buh ïa ka aspatal ne ka “Rehabilitation Centre”. Ki nongkitkam shnong bad kumjuh ruh ki nongshong shnong ki dei ban sngewthuh shai ïa kane. Hooid, teng-teng ka ju wan ka jingbitar pyrshah ïa ki nongdih drok namar lehse ki donkti ha ki kam tuh kam thiem ha shnong ha thaw. Hynrei ban shu pynshitom ïa ki da kaba tied bad bom, kam dei satia ka lynti kaba hap ban shim dano-dano.
Kum ki nongïalam shnong ki dei ban ïasyllok bad kito ki nongdih drok bad ki longïing-longsem jong ki bad ban ïarap ban pynwad ïa ki lad jingsumar. Ban rat dyngkhong ïa kane ka jingdih drok, dei ban don ka mynsiem ban ïatreilang namar khlem ka jingïatreilang jong baroh, yn ym lah satia ban thaw pyrthei. Naduh shimet haduh ha ïing ha sem, ha shnong ha thaw, bad khamtam na ka liang ki bor pulit, ka jingpeitngor bad jinghusiar ki dei ban wan hakhmat. Lada baroh ngi long kiba peitngor, shisien ka sngi ngin sa lah ban pynduna ïa ka jingsaphriang jong kine ki drok kiba la pynsyrtok.
