Shillong, Ïaïong 28
Hadien katto-katne kynta ka jingshah kem jong u President ka North Eastern Hill University Student’s Union (NEHUSU), u samla Sandy Sohtun ha ki bor pulit jong ka East Khasi Hills ha ka 28 tarik mynta u bnai, ka la pynlong ïa ki samla pule jong kane ka skulbah ba kin ïalum lang hakhmat ka khyrdop ban rung sha katei ka jaka pule ban khanglad ïa ka jingwan poi lai pyrton ki pulit CRPF hapoh ka phyllaw jong ka skulbah.
Kane ka jingwan poi lai pyrton ki pulit CRPF hapoh katei ka skulbah ka dei kum shibynta ban pynneh-pynsah ïa ka shongsuk-shongsaiñ hapoh katei ka skulbah bad ban ai jingïada ïa u nonghikai uba la kynnoh ba u la shah shoh ha u President ka NEHUSU, u samla Sandy Sohtun ha ka 24 tarik u Ïaïong, 2025.
Kum ban shu kdew hangne, u Dr. Alok Singh uba dei nonghikai jong ka sobjek Hindi ha ka skulbah North Eastern Hill University (NEHU) u la ujor da ka ejahar pyrshah ïa u President ka NEHUSU halor ka jingkynnoh ba utei u samla ryngkat bad san ngut kiwei pat ki la donkti ha ka ban shoh bad pynmynsaw ïa u ha ka 24 tarik u Ïaïong, 2025.
Halor ka jingwan poi ki bor pulit ka East Khasi Hills ba la ïalam da u Majistor ryngkat ka jingsynranlang da ki pulit CRPF, na ka liang ki samla pule ka skulbah ki la pynpaw ïa ka jingsngew lyngngoh halor kane ka jingwan poi kynsan ki bor pulit da ki spah ngut ban tohkit halor katei ka jingjia kaba pynlong ruh ïa ki samla pule ba kin pakhang lynti ïa ki bad ban dawa ba ki dei ban mih mardor napoh katei ka skulbah kaba la mih ruh ka thma ktien kaba jur bha hapdeng ki samla pule bad ki bor ka aiñ. La ïathuh ruh ba ki bor pulit kiba don da ki phew ngut ki la rung hapoh ka skulbah khlem ka jingai jingmynjur na ka Vice-Chancellor (In-charge) ka skulbah, Prof. S.M Sungoh. Kum ka dak ban pyrshah jur halor kane ka jingwan poi da ki spah ngut ki bor pulit hapoh katei ka skulbah, na ka liang ki samla pule ki la khang lut ïa baroh ki khyrdop ka skulbah bad set ïa baroh ki kali shapoh ka skulbah.
